Narsaq

Arnat uranisiornissamut akerliusut ersarissumik akineqarusupput

Narsami innuttaasut, ingasammik arnat, Kuannersuarnut pilersaarutinut nalornissuteqarput. Taakkua politikerinit aatsitassarsiorniartunillu apeqqutiminnut akineqarnissaminnut amigaateqarput

Sapaammi ataatsimiisitsinermi blok-G-mi peqataasut ilaat

Arnat uranisiornissamut akerliusut Narsami innuttaasunut soqutiginnittunut tamanut sapaatiummat ataatsimiisitsipput.

Ataatsimiisitsinerannut pissutaavoq arnat ingeniørit suliffeqarfiannit Grontmijimit, maanna GME A/S sullillugu VSB-mik nalunaarusiuleruttortumit, aggersarneqarsimammata.

Grontmijermiut tusarusussimavaat arnat Kuannersuarni aatsitassarsiornissamut sooq akerliunersut.

Arnat oqariartuutaat kisimik imaqarniliarineqartut
Kisianni ataatsimiinnermi oktobarip 21-ani pisumi pilertortumik paasinarsivoq ataatsimiisitsineq GME sunniiniarnerinnarigaa, tassami Grontmijikkormiut taanna sullimmassuk.

Ataatsimiinneq naammassineqarmat arnat ataatsimiinneq imaqarniliorneqarumaartoq neriorsorneqarput. Kisianni imaqarniliaq takkummat arnat oqariartuutigisaat kisimik imaqarniliarineqarsimapput, Grontmijikkormiut eqqartugaat ilanngunneqaratik.

Apeqqutit qulit KNR’p qineqqusaartitsinissaanut piareerneqartut
Taamaammat arnat uranisiornissamut akerliusut aalajangersimapput Narsami innuttaasunut soqutiginnittunut ataatsimiisitsiniarlutik, arnammi Kuannersuarmi aatsitassarsiornissamut innuttaasut eqqarsaatersuutaat ernummataallu paaserusuppaat.

Ataatsimiinnermi suleqatigiit assigiinngitsut pilersinneqarput, kingornalu apeqqutit qulit politikerinut pingasunngornermi qineqqusaartitsinissamut apeqqutissat suliarineqarlutik.

Apeqqutigineqartussani igitassat, tailingsinik taaneqartartut, assersuutissaapput.

Pilersaarutaavormi tasermut, Narsap eqqaani Dyrnæsdalenimut ornigarneqarluartartumullu, kuuttartumi igitassat iliorarneqarnissaat.

- Kiap taseq igitakullu nakkutigissavai, aatsitassarsiortut?

- Taamatut eqqaaviliornermut inatsit suna toqqammaviussava?

Tassa apeqqutit tamakkua ilagaat Arnat uranisiornissamut akerliusut Narsami innuttaasunut soqutiginnittunut tamanut sapaatiummat ataatsimiisitsimmata suliarineqartut.

- Pilersaarutaavoq imeq tatsimit kuuttoq salinneqartassasoq. Kisianni ukiumi nunarsarnilerluni sialussualerluniluunniit sapusiaq qarsutsigivigineqarpat taava qanoq iliortoqassava? Taava illoqarfimmi innuttaasunut qanoq kinguneqassava? Ilaatigut taama aperisoqarpoq.

Apeqquterpassuupput, kisianni suli iluamik akissutissarneqanngitsut, gruppip oqaaseqartartua Marianne Jensen oqarpoq. Taassuma neriuutigaa paasisitsiniaasoqarnerussasoq politikerillu pingasunngorpat akissutissaqarluarumaartut.

Powered by Labrador CMS