VM-imut anngunniunneq
Arnat nunanut allanut unammisartut ajugaagaluartut VM-imut anngussinnaajunnaarput
Kalaallit arnat assammik arsarlutik nunanut allanut unammisartut Amerikap Nunavissuani Pissartanngorniunnermi USA ajugaaffigaat
Kalaallit assammik arsarlutik nunanut allanut unammisartut USA 28-22-mik ajugaaffigigaluarlugu nunarsuarmi pissartanngorniunnissamut anngunnissaminnut periarfissaqanngillat.
Tassami gruppimi unammereernerni Kalaallit Nunaat pingasunik pointeqarpoq, normu 2-lu, Paraguay, arfinilinnik pointeqarluni. Arnallu nunanut allanut unammisartut unamminissaq ataasiinnaq amigaatigaat, taamalu semifinalimut, VM-imut anngutsitsisinnaasumut, anngussinnaajunnaarlutik.
Arnalli USA-mut unammilluaqaat. USA-mut unamminerup immikkoortua siulleq naammat naligiiginnarput, 14-14-erlutik.
Unamminerup immikkoortuata aappaani Kalaallit Nunaat siuariartorpoq, tassalu 28-22-mik ajugaalluni.
Mia Egede Rasmussen USA-mut unamminermi unammilluaqqippoq, 11-nillu isertitsilluni.
Kalaallit Nunaat gruppimi naggataamik unammissaaq ullumi ataasinngornermi, unammissallugu Puerto Rico, unamminerlu nunatta nalunaaqutaa malillugu nalunaaqutaq 11 aallartissaaq.
Unamminerit siulliit sisamat kingorna inissisimanerit:
Brasilia: 8 point
Paraguay: 6 point
Puerto Rico: 5 point
Kalaallit Nunaat: 3 point
Venezuela: 2 point
USA: 0 point