Arnat nakuuserfigineqartaranerat akiorniarlugu suliniummut Mary Fonden ilaavoq

Qallunaat-kalaallit suleqatigiillutik suliniutaatigut nutaakkut "Kalaallit Nunaanni Qimarnguiit", qimarnguinni ataasiakkaani suliniuteqarneq nukittorsarneqassaaq, tamannalu pissaaq attaveqarnermik suliniutikkut aammalu pisortat sulisullu pisinnaasaasa ineriartortinnerisigut.
Suliniummik tamatuminnga suleqatigiipput Danner, nunatsinni qimarnguiit aamma Qimarnguiit Peqatigiiffiisa Kattuffiat, Mælkebøttecentret, Ilaqutariinnut Inatsiseqarnermullu Naalakkersuisoqarfik kiisalu OAK Foundation Denmark, suliniummullu ilaatigut isumassarsiffigineqarsimapput qallunnat Akiani Qiterlermi Afrikallu avannaani suliniutaat.
2013-imi Kunngissap Nulia aamma Mary Fonden-ip pisortaa, KVINFO, Danner aamma LOKK peqatigalugit Marokkomut tikeraarput nunat tamalaat suleqatigiinnerat takuniarlugu.
– Arnanut nakuusertarneq nunarsuarmi tamarmi ajornartotsiutaavoq, nunarsuarmilu sumiikkaluaruilluunniit nakuuserfigineqarneq assigiimmik kingunerlutsitsisarpoq. Taamaattumik isumassaqarluarpoq kulturit nunallu killeqarfii akimorlugit arnat tapersersornissaannut suleqatigiinnissaq. Mary Fonden-imni neriuutigaarput suliniummi matumani peqatigiilluarfiusumi nunani tamalaani misilittakkat atorneqarsinnaasut Kalaallit Nunaanni arnat meeqqallu nakuuserfigineqartut tapersersornissaannut, Kunngissap Nulia oqarpoq.
Kalaallit qallunaallu tamatuminnga ingerlatsisut suleqatigiillutik qulakkiissavaat misilittakkat pitsaasut atorneqarnissaat nunatsinnilu pissutsinut naleqqussarnissaat.