Ilinniarfissuaq

Arnat marluk aquut tiguaat

Britta Lohmann Parma Sonberg Egedellu meeqqat atuarfiini ilinniartitsisut pitsaasut qulakkiissavaat

Britta Lohmann Ilinniarfissuarmi pisortaaginnassaaq

Britta Lohmann Ilinniarfissuarmi pisortaaginnarluni immikkoortortaqarfimmi pisortaq Parma Sonberg Egede suleqatigalugu ilinniarfiup ineriartornera aaqqissuunneqaqqinneralu sulissutigissavaat.

- Qilanaaraara institutimi pisortap Britta Lohmannip aamma immikkoortortami pisortap Parma Sonbergip aqutseqatitut suleqatigilernissaat, peqatigalugillu ilinniartitsisunngorniarnerup ineriartorteqqinnissaa ilinniartitsinermi ilisimatusarnermilu pitsaassuseq qitiutillugit, rektor Tina Pars tusagassiuutinut nalunaarummi allappoq.

Upernaaq Ilinniarfissuaq nalilersorneqarmat ilinniartitseriaaseq isornartorsiorneqareersorlu Britta Lohmann pisortatut inissinneqarpoq. Tassani institutimi pisortaagallartutut aprilimili atorfinilluni.

Britta Lohmannip akisussaaffigissavaa institutip periusissanut pilersaarutit naapertorlugit ingerlannissaa, ilisimatusarnermik tunngavilimmik ilinniartitsisunngorniartarnissaq kiisalu qulakkiissallugu avataaniit suleqatigisartakkanut attaveqarnissaq suleqateqarnissarlu.

Parma Sonbergip akisussaaffigissavaa ilinniartitsisunngorniarnerup ulluinnarni aqunneqarnera, kiisalu ilinniaqqittarnernilu ingerlatat. Parmap piffissami sivitsortumi misilittagaqarfigai ilinniartitsinikkut ingerlatat aqunnissaat, kiisalu meeqqat atuarfianni ilinniartitsisut sulinerminni aporfigisartagaat sukumiisumik ilisimasaqarfigalugit, tusagassiuutinut nalunaarummi erseqqissarneqarpoq.

Taakku 1. januar 2017 aallarnerfigalugu atorfinippata Ilinniarfissuaq suleqatigiinnikkut ingerlalluartumik aqunneqalerluni Nunatsinni meeqqat atuarfiini pikkorissunik ilinniartitsisunik ilinniarsimalluartunik peqalernissaa Ilisimatusarfiup naatsorsuutigaa.

Powered by Labrador CMS