Tuesday, October 31, 2017 - 14:23

Arnat assammik unammiuaatarnerat naggaserneqassaaq

Faxe Kondi Cup naggataamik sisamanngorpat aallartinneqassaaq
Assi.: Leiff Josefsen
Arnat assammik arsaallutik unammiuaarutaat Faxe Kondi Cup naggataamik unammissutigineqassaaq. Unammiuaarneq sisamanngorpat aallartissaaq

- Pisartoq naggaserneqarpoq.

Assammik arsaattartut peqatigiiffiat GSS, ukiuni arlalinngortuni arnat assammik arsaallutik unammiaartarnerinik Faxe Kondi Cup'imik aaqqissuisuusarsimasoq allappoq.

Ukiunimi arlalinni suleqatigineqarsimasoq unammiuaarnermilu aningaasaliisartuusoq Faxe Kondi (Royal Unibrew A/S) GSS assammik arsaattartut peqatigiiffiat isumaqatigalugu ingerlatseriaaseq siunissami allanngortissallugu aalajangersimavoq. Taamaattoq arnat unammiuaartarnerannut allamik aningaasaliisartoqalernissaa periarfissaqalertoq, GSS paasissutissiivoq.

Assammik arsaannermut isumalerujussuaq

Unammiuaarnermut 1991-imi arnat assammik arsaattarnerat ineritsikkiartornissaa anguniagaralugu pilersinneqarsimasoq, assammik arsaannerup iluani kalaallit unammisartuinut ilisimasatsinnut isumaqarsimaqaaq. Arnat unammisartorpassuit Faxe Kondi Cup'ernermi peqataasarsimapput aammalu nunanut allanut unammisartunik pilersitsiviusarsimalluni.

Arnanut nunanut allanut unammisartut, ukiuni arlalinni takussaavallaarsimanngitsut, assammik arsaattartut kattuffia ukiuni kingullerni sisamani arnanut nunanut allanut unammisartunut unammisartunik peqartuaannarnissaa anguniarlugu aaqqissuussisarsimavoq.

Siunissaq qaamasoq

Tassunga atatillugu Kalaallit Nunaanni Assammik Arsaattartut Kattuffia "Piginnaanillit" pilersissimavai, arnallu nunanut unammisartut naapeqatigiinnerini unammillutillu immikkut sungiusaqataasarput, tassani unammisartut nunanut allanut unammisartunngornissamut piukkunnaatillit siunnersorneqarnissaat ineriartortinneqarnissaallu anguniarneqarluni.

- Arnat nunanut allanut unammisartuisa pitsaanerpaaffigisisinnaasaat anguniassagaanni naammagittarsinnaassuseq ungasissumulli pilersaarusiornissaq pisaqariaqarpoq. Piginnaanillit siusissukkut timigissarnermik, unammeriaatsimik, pissuserissaarnermik, nerisaqarnermik il.il. sungiusarneqartarput – taamaammat takorloorpara ukiut arfineq-marluk arfineq-pingasulluunniit qaangiuppata nunanut allanut unammisartussat, ullumikkut nunanut unammisartuusunit aammalu "piginnaaneqarsimasut" PANAM pissartanngorniunnerni VM-imut anngunniuteqataasarnissaat, arnat nunanut allanut unammisartuisa sungiusaasuat Johannes Groth tusagassiuutinut nalunaarummi oqarpoq.

Ukioq manna Faxe Kondi Cup'ertoqarnerani unammisartoqatigiit Nuumminngaanneersut taamaallaat peqataassapput. Unammisartoqatigiit arfinillit peqataassapput, taakkuli marlunnut avinneqarsimapput.

Aajuku Faxe Kondi Cup'imi peqataasussat:

Pitsaanerit:

GSS
NÛK
Talenthold

Pitsaanerit tullii:

GSS Motionister
NÛK II
Byhold

Unamminerit siulliit sisamanngorpat ingerlanneqassapput, inissinniuunnerillu sapaatiuppat ingerlanneqassallutik. Unamminerit Nuummi Inussivimmi ingerlanneqassapput.

Seneste nyheder / Nutaarsiassat kingulliit