Arnat assammik arsarlutni unammisartut tullinnguupput

Kalaallit arnat assammik arsarluni nunanut allanut unammisartut Amerikap Nunavissuani Pissartanngorniunnissamut anngunniulluni unammiuaarnermi Puerto Rico-mi ingerlanneqartussami ataasinngorpat unamminerminni siullermi USA unammissavaat.

Unammisartut caribiami qeqertamut namminersortumut marlunngornerup unnuaani tikipput, olumpiadimullu sungiusartarfimmut atugassarissaartinneqarlutik inissinneqarlutik, Kalaallit Nunaanni Assammik Arsartartut Kattuffiat tusagassiorfinnut nalunaarutikkut paasissutissiivoq.

Unammiuaarnerit sapaatip akunnerani tullermi attaasinngornermitit tallimanngornermut ingerlanneqassapput. Cuba, nunanillu peqataasunit arfinilinnit angusarissaarnerit sisamat, Amerikap Nunavissuani Pissartanngorniunnissamut, Cuba-mi Havana-mi maajip 21-annit 28-annut ingerlanneqartussamut, anngutissapput.

Kalaallit arnat assammik arsarluni nunanut allanut unammisartut unnugu, arfininngornermi, Puerto Rico-mi sungiusaatigalugu unammissapput.

Anngunniulluni unammiuaarnermi kalaallit unamminissaat:

Ataasinngorneq marsip 30-at nal. 16.00: USA - Kalaallit Nunaat
Marlunngorneq marsip 31-at nal. 16.00: Kalaallit Nunaat - Mexico
Pingasunngorneq apriilip 1-at nal. 20.00: Kalaallit Nunaat - Puerto Rico
Sisamanngornewq apriilip 2-at nal. 18.00: martinique - Kalaallit Nunaat
Tallimanngorneq apriilip 3-at: Qasuersaarneq
Arfininngorneq apriilip 4-at nal. 13.00: Kalaallit Nunaat - Cuba
Sapaat apriilip 5-at: Inissinniulluni unamminerit.

Piffissat tamarmik sumiiffimmi nalunaaqutaq malillugu.