Arnanut persuttaanerit
Arnat 62 procentii persuttagaanermik misigisaqarsimasut
Arnanut persuttaasarnerup unitsinniarneranut Naalagaaffiit Peqatigiit nunarsuaq tamakkerlugu ullorititaa arfininngorpat malunnartinneqassaaq
- Persuttaasarneq utoqqatsissutissartaqanngisaannassaaq aamma kikkut tamarmik persuttaanertaqanngitsumik inuuneqarnissaminnut pisinnaatitaaffeqarput.
Arnanut persuttaasarnerup unitsinniarneranut Naalagaaffiit Peqatigiit nunarsuaq tamakkerlugu ullorititaanut atatillugu, aqagu arfininngornermi malunnartinniarneqartussaq, Isumaginninnermut, Naalakkersuisoq Sara Olsvig oqarpoq.
Oqariartuut Kalaallit Nunaannut pingaaruteqarluinnarpoq, misissuinerimmi takutippaat nunatsinni arnat inersimasut 62 %-ii piffissap ingerlanerani persuttarneqartarsimasut, Sara Olsvig tikkuaavoq.
- Persuttaasarneq inuiaqatigiinni akuererusunngilarput. Nunatsinni arnat 62 %-ii piffissap ingerlanerani persuttarneqartarsimanerisa kisitsisitaat qaffasippallaarujussuarput. Tamatuma takutippaa, persuttaanermik akiuiniarneq aamma arnat persuttarneqartarnerannik annikillisaaneq suli ukkatariuassagipput, taanna tusagassiuutinut nalunaarummi oqarpoq.
Persuttaasarneq akiorniarlugu Naalakkersuisut 2014-imiit 2017-imut periusissiaat iliuusissatullu pilersaarutaat Naalakkersuisoqarfiup ukiuni kingullerni persuttaasarneq akiorniarlugu susassaqarfinni arlariinni suliaqarneranut tikkuussisuusimavoq.
- Ataatsimut oqaatigalugu ilaatigut persuttaasartunut katsorsaanissamik neqerooruteqarnissamik piviusunngortitsinermik, arnanut qitornaannullu persuttagaasimasunut nuna tamakkerlugu qimarnuik katsorsaaviutigisoq pilersinneqarneratigut, angutit oqaloqatigiittarfiannik pilersitsinermik kiisalu oqartussaasoqarfiit assigiinngitsunik suliallit akornanni suleqatigiinnerup nukittorsarneqarneranik kinguneqarpoq, Namminersorlutik Oqartussat paasissutissiipput.
Naalakkersuisut kissaatigivaat suliaq pingaarutilik ingerlatiinnarneqassasoq aamma persuttaasarneq akiorniarlugu periusissiaq 2017-ip kingorna atuuttussaq massakkorpiaq ineriartortinneqarpoq.
- Periusissiaq nutaaq atorlugu ilaatigut pitsaaliuineq pingaartinneqassaaq, tassunga ilanngullugu tarnikkut persuttaanermik pitsaaliuineq, persuttaasarneq pillugu ilisimasat annertusineqarnerat, persuttarneqarsimasunut aamma persuttaasartunut katsorsarneqarnissamik neqerooruteqartarnerup annertusineqarnera ineriartortinneqarneralu. Tassunga ilaatillugu qulakkeerneqassaaq neqeroorutit pioreersut tunngavilersoqqinneqarnissaat aamma ineriartortinneqarnissaat. Tamanna ilaatigut qimarnguinnut atatillugu atuuppoq, taamaasilluni arnanut aamma meeqqanut persuttarneqarsimasunut suliaat pingaarutillit tunngavissikkumallugit, Namminersorlutik Oqartussat nalunaaruteqarput.