Arnaqatiminnoortut anguteqatiminnoortullu katitinneqarsinnaalernerat nuannaarutigigaat

Kalaallit Nunaanni arnaqatiminnoortut anguteqatiminnoortullu ungasinngitsukkut katitinneqarsinnaalissapput. Inatsisartut isumaqatigiissut inatsit arnaqatigiit anguteqatigiillu katissinnaanerannik ajornarunnaarsitsisoq sapaatip-akunnerani siusinnerusukkut akuersissutigaat. Ineriartorneq tamanna Søren Laursenip, Danmarkimi Landsforeningen for Bøsser, Lesbiske og Transpersoner (LGBT-p) siuttuata, nuannaarutigaa.- Tamannami isumaqarpoq inuiaqatigiit naalakkersuisullu tungaannit pineqartup tamatuma tamakkiisumik naligiissitsiviulerneranik, oqarpoq. - Siornatigut arnaqatiminnoortunut anguteqatiminnoortunullu inatsit ataaseq kiisalu arnanut angutinoortunut angutinullu arnanoortunut inatsit ataaseq atuussimapput. Kisianni inuiaqatigiinni immikkoortukkuutaanut assigiinngitsunut assigiinngitsunik inatsiseqassanngilaq. Taamaattumik maanna saliisoqarnera nuannerluinnarpoq, kikkut tamarmik assigiinnik inatsiseqalerlutik. Kalaallit Nunaanni arnaqatinoortuuneq anguteqatinoortuunerlu ajornaatsuinnaasimanngilaq, oqaluttuarpoq. Nuummi qanittukkut pride-paradeqarnerani Søren Laursen naapertorlugu innuttaasut tapersersuilluarsimapput. Tapersersuineq tamanna pisinnaalersimavoq nikussaarluni oqartoqarsimammat maanna qanoq pisoqartariaqalersoq. - Ingerlaaqatigiittarnermik aaqqissuussisoqarsimavoq, aamma LGBT-mik kattuffiliortoqarsimavoq. Tamatumani Kalaallit Nunaanni inuiaqatigiit ineriartorluarput, oqarpoq. - Nunarsuarmi sumiiffiit ilaanni taama ineriartortoqarnera takusinnaallugu nuannarpoq, nunarsuarmimi sumiiffinni allani ajorluinnartumik ingerlasoqarmat. Inatsisartut inatsimmik arnaqatiminnoortut anguteqatiminnoortullu katissinnaalernissaannik periarfissiisumik 2010-mili akuersissutiginnipput, taamanili kukkuluttortoqarneratigut inatsit piviusunngortinngitsoorneqarluni. Taama KNR allappoq. Inatsit Danmarkip suli oqartussaaffigisaata ataaniimmat atuutilersinnaanngortinnagu Folketingimit naammassillugu suliarineqaqqaassaaq. Tamanna qineqqusaarneq maanna ingerlanneqartoq aatsaat naammassereersimalerpat pisinnaassaaq. Danmarkimi arnaqatigiit anguteqatigiillu katissinnaanerat 2012-imi inatsisitigut pisinnaalerpoq.