Ujaarisitsineq
Arnaq ujaarineqartoq kalaallit kilisaataaniissimasorineqartoq
Arnaq islandimiu arfininngormalli periarfeerunneqartoq kalaallit kilisaataanni Polar Nanumi ilaasimasinnaasoq ilimagineqarpoq. Islandimi politiit kilisaammi inuttat killisiussagaat islandimi nutaarsiassaqartitsiviit paasissutissiipput
Arnaq 20-nik ukiulik arfininngornerup ullaassaani illoqarfimmeereernerup kingorna periarfeerunneqarpoq. Taama netavisen Icelandmonitor allaaserisaqarpoq.
Arnaq pineqartoq Kalaallit kilisaataanni Polar Nanumi ilaasimasinnaasoq islansimi politiit isumaqarput.
Arnaq biilinut aappaluttunut Kia Riomik meqqilinnut ikineqarsimasoq Islandimiut tusagassiorfiit arlallit allaaseraat.
Biililu taanna umiarsualivimmi Hafnarfjörðurimiittumi Reykjavik ilaani toraarneqarpoq.
Biili pineqatoq Polar Nanumi inuttanik Hafnarfjörðurimiittumi talinngasumi attartorneqarsimavoq. Arnallu mobiltelefonia Icelandmonitorip paasissutissaatai malillugit umiarsualivimmiissimasoq takuneqarsinnaalluni. Periarfeerunneqartup kamippai umiarsualivimmi kilisaatip talinngaffigisaani aamma nassaarineqarsimallutik.
Fréttablaðið paasissutissaatai malillugit kilisaat islandimi sinerissami alapernaarsuisut malissimavaat. Alapernaarsuutillu Tritonip Issittumi sakkutooqarfiup umiarsuaata Polar Nanoq naapigiarpaa.
Nutaarsiassat kingulliit Iceland Monitoriminngaanneersut malillugit islandimi sinerissami alapernaarsuisut Polar Nanumut attaveqarsimapput kilisaallu Islandimut uteqqullugu piumaffigisimallugu, inuttaasut politiinik killisiorneqassammata.
Kalaallit Nunaanni Politiit islandimi poliitinik ikiortiserumaneqarsimanatik nakkutilliisup Mads Lyngep Sermitsiaq.AG-mut oqaatigaa.