pinerluttulerineq
Arnaq toqutsisoq ukiuni tallimani inissiisarfimmiittussanngortoq
Unnerluussisussaatitaasut aamma pineqaatissinneqartup aalajangiineq suliassanngorteqqinniarlugu isumaliuutigaat
Arnaq 43-nik ukiulik aapparisimasaminut savimmik toqutsisutut sisamanngornermi ukiuni tallimani inissiisarfimmiittussanngorlugu Qaqortumi eqqartuussivimmi pineqaatissinneqarpoq.
Pisoq arfininngornermi juunip 18-ani ualikkut Qaqortumi adressemi Kamikoorfimmi pivoq.
Atuaruk: Qaqortumi toqutsisoqartoq
Arnaq taanna 43-nik ukiulik inuit allat ilagalugit tassaniippoq, angut 30-nik ukiulik siornatigut aapparisimasaa aamma ilaavoq.
Savimmik angisuumik aallertoq
Inuit peqataasut ilaata arnaq ingerlaqqummagu savimmik angisuumik igaffimmut aallerpoq, inimullu uteqqippoq.
Atuaruk: Mianersuaalliorluni toqutsisutut eqqartuunneqartoq
Tassanilu angut 30-nik ukiulik perianngitsoq sakiaatigut uummataa uniulaarlugu ataasiarlugu kapivaa, kingornalu angut aaverluni toquvoq.
Suliassanngorteqqinniarlugu isumaliortut
Politeeq Jack Nathansen, Kujataani politiineersoq, Qaqortumi unnerluussisussatut peqataasoq, ukiuni arfinilinni pineqaatissiinissamik piumasaqaraluarpoq, arnallu illersuisua pineqaatissinneqassappat ukiuni sisamani piumasaqarluni.
Eqqartuussiviup ukiuni tallimani inissinneqartussanngorlugu aalajangiuppaa.
Illuatungeriit tamarmik, unnerluussisussaatitaasut aammalu pineqaatissinneqartoq, maanna aalajangiineq suliassanngorteqqissanerlugu isumaliuutersuutigaat.