Savilersorneq
Arnaq savilersortuusimavoq
Nuummi sapaataalersumi unnukkut immerniartarfiup Kajistiinaaqqap silataani parruttoqarnerani, arnaq 30-liingajalersoq, inunnik pingasunik kapisisimasutut pasineqarpoq.
Sermersuup Eqqartuussviata arnaq inunnik pingasunik kapisisimasoq tunngaviusumik inatsit tunngavigalugu sapaammi killisiorneqarnerani tigummigallagassanngortippaa. Taanna paasiniaanerup ingerlanneqarnerani 22. decmber tungaanut tigummigallarneqassasoq, eqqartuussiviup aalajangiuppaa.
Inuunerminnik navianartorsiunngitsut
Savimmik kapitittut pingasut napparsimavimmi passuttarneqarput. Taakku inuunerminnik navianartorsiunngitsut nalunaarutigineqarpoq, unnerluussisussaatitaasoq Nanna Werther tusagassiuutinut nalunaarummi paasissutissiivoq.
Tunngaviusumik inatsit tunngavigalugu killisiuineq matoqqasumik ingerlanneqarpoq, taamaanna politiit annertunerusumik paasissutisseerusunngillat.
Pinngitsuunerartoq
Arnaq pinngitsuunerarpoq, tigummigallagaanissanilu akueraa, politiit tusagassiuutinut nalunaarutaanni allassimavoq.