Arnaq naartusoq aappaminit nakuuserfigineqartoq

Sapaatip akunnerani kingullermi Nuummi politiit assigiinngitsorpassuarnik pisunik suliaqarput. Ilaatigut pisiniarfinni aamma angerlarsimaffini tillinniat.

- Taamaattorli nakuusernerit aammalu kinguaassiutitigut pinerlunnerit sapaatip akunnerata naanerani pisut ersarissarneqartariaqartut Nuummi politiini piareersimasut pisortaat, Sebastian Leonhard Bech allappoq.

Nakuusernermi suliat ilaanni arnaq naartusoq aappaminit nakuuserfigineqarsimavoq.

- Ilanngullugu taasariaqarpoq, arnaq inuusuttuaqqanit arlalinnit 10-13-illu akornanni ukiulinnit nakuuserfigineqarpoq. Arnaq ajassimavaat, tamatumalu kinguneranik arnap talini napivaa. Cigaretsinik pisititsiumasimanngimmat nakuuserfigisimavaat, politiit piareersimasuat ilisimatitsivoq.

Kinguaassiutitigut pinerlunnerit arlallit
Sapaatip akunnerata naanerata ingerlanerani kinguaassiutitigut pinerlunnerit arlallit politiinut nalunaarutigineqarput. Kinguaassiutitigut pinerlunnerit nangikkiarnerni pisimapput.

- Tamatumali kinguaassiutitigut atornerluineq imaluunniit allatigut pinerlunneq pitsaanerulersinngilaa, kisianni taama pisoqarnissaa pinngitsoorniarlugu nammineq iliuuseqartoqarsinnaavoq.

- Taamaammat politiit aammaaqqillutik inuit eqqaaseqqikkusuppaat piffissaatillugu taxanik angerlartarnissaat, aammalu isumatusaarluni imigassartortassasut. Siunnersuutitsialak eqqaamallugu ‘Max 4 tassa’, politiit taama oqariartuuteqarput.