pilluarit
Arnaq malunnaatilik 60-nik ukioqalerpoq
Nunat avannarliit Odensemi illuutaanni aamma Kalaallit Odensemi illuanni pisortaq Kirsten Mærsk 60-nik ukioqalerpoq
- Inunnik sullissineq angerlarsimaffinnit ilitsoqqussaraara, Kirsten Mærsk inuuissiornermi atatillugu Sermitsiaq.AG-mit apersorneqarnermini oqarpoq.
- Billundip eqqaani Jyllandimi nunaateqarfimmeersuuvunga. Inunnik atorfissaqartitsisunik ikiuisuaannarpugut. Inuit ataatsimuussusitsinnut ajattornagit pisarpagut.
Kirsten Mærskip suliarisimasai takullugit takuneqarsinnaavoq inunnik pisariaqartitsisunik sullissisorujussuusimasoq. Inunnik isumaginnittutut ilinniarsimasuuvoq. Kalaallit Illuutaanni Odensemi ilinniartunut siunnersortaavoq. KFUM-imi ornittarfimmi Odense Paraplyenimi pisortaavoq, Kalaallit Illuutaanni pisortaavoq kiisalu Nunat avannarliit illuanni aamma pisortaalluni.
Nunat avannarliit illuat
Nunat avannarliit illuat qanoq ineriartorsimanersoq Kirsten Mærskip nuannaarutigaa.
- Kalaallit Illuutaannitut ineriartornera pitsaasumik ingerlavoq. Hunderupvejimiikkunnaarnerput pissutigalugu kalaallit ilaatinniarnissaat ajornakusoortussaasutut isigisimagaluarparput. Qujanartumik taamatut pisoqanngilaq.
- Kikkummi tamarmik inissaqartinneqartariaqarput. Sisamanngornermi kaffisoqatigiittoqarnerani inunnit 100-nit ilaaffigineqarpoq. Meeqqanit aamma inersimasunit. Eqqumiitsuliat assigiinngitsorpassuit saqqummersinneqartarput, tassani nunani avannarlerneersut piginnaasaat saqqummiunneqartarput, Kirsten Mærsk oqarpoq.
Kirsten Mærsk assammik arsartarnikuuvoq. Qaammatini pingasuni 1984-mi Sisimiuniinnermini S-68-ni unammeqataasarluni. Aviisinik atuartarpoq aamma atuakkanik. Assigiinngitsorpassuarnillu allanik aamma sammisaqartarluni.
Assit ataani takukkit