Qaqortoq
Arnaq inuusuttoq itersamut nakkareerluni toqusoq
Arnaq inuusuttoq Qaqortumi alianartumik pisoqareerneratigut toqukkut qimaguppoq
Qaqortumi ruujorilerisut assaaffigalugu suliffigisaminni tallimanngornermi ullaakkut arnaq inuusuttoq nakkarsimasoq nassaaraat.
Qaqortumi politiit najoqqutaralugit arnaq inuusuttoq imerniartarfiup Arctic Cafep silataani itersamut assanneqarsimasumut nakkarsimavoq.
Arnaq nassaarineqarami timaa kissarnikillereersimavoq erngiinnarlu Qaqortumi napparsimaviliaanneqarsimalluni. Ualerlu taanna aamma Nuummi Sanamut aallarunneqarsimavoq. Kisiannili unnukkut toqusimalluni.
Kujataani politiineersoq, politikommissæriugallartoq, Siivaleeraq Therkelsen Sermitsiaq.AG-mut taama oqarpoq.
Politiit suliaq misissuiffigigamikku oqaatigisinnaanngilaat suna toqussutaasimasoq imaluunniit pinerluttoqarsimanersoq. Misissuinerminnullu atatillugu toqusut timaanik misissuisartumik Danmarkimiit tikisitsisimapput sunarpiaq toqqutaasimanersoq paasiniarlugu.