Eqqussineq
Arnaq inuusuttoq hashimik 1,7 kiilumik eqqussisoq tigusarineqartoq
Arnaq 20-t sinnerlugit ukiulik qaammatini arfinilinni pinerluuteqartut inissiisarfianiittussanngorpoq
Arnaq inuusuttoq 1,7 kilo hashimik pisattami akornani toqqortaqartoq Narsarsuup Mittarfiani juunimi unitsinneqarpoq.
Taanna mittarfimmi tigusarineqarpoq, tigusarineqarnermilu kingorna manna tikillugu tigumigallarneqarsimalluni.
Qaqortup eqqartuussiiviani ippassaq eqqusseriaraluarsimanera pillugu taanna qaammatini arfinilinni isertitsivimmiitinneqartussanngorlugu pineqaatissinneqarpoq.
- Massakkut arnaq aasap sinnera tamaat isertitsivimmiittussanngorpoq, aammalu aanngajaarniutinik eqqusseriaraluarsimasutut pillagaasimanini allagartaqassutigilerlugu. Siunissami suliffigilerumaakkat eqqarsaatigalugit tamanna akisoorujuuvoq, imminulli akilersinnaanngilluinnarluni, politikommissæri Laila Thomassen Fleischer oqarpoq.
Angut 40-t missaani ukiulik suliamut tunngatillugu politiinit tigusarineqarsimavoq. Taanna hash-ip Danmark-imi pisiarineqarsimaneranut Qaqortumilu tigusisussatut aaqqissuisuusimasutut politiinit pasineqarpoq. Taanna suli tigummigallarneqarpoq.