kakkaak
Arnaq angallammi ilaasartaammi ernivoq
Kangaamiut Maniitsullu akornanni tupinnartoq. Nukappiaraq angallammi ilaasartaammi inunngorpoq
Angallat ilaasartaat ’Bolatta’ ataasinngornermi ualikkut ernisarfinngoriasaarpoq. Arnaq siusinaartumik ernivoq angallammik Maniitsumut ingerlaartillutik. Anaanaq nukappiararlu tamarmik ajunngillat.
Ernineq siusinaartumik pimmat suli napparsimmavimmut anngunnatik erninera pivoq. Ernineq ajunngitsumik naammassineqartoq imaani Maniitsup ungasinngisaani pivoq angallammi ilaasartaammi ’Bolatta’mi arnamik aallertinneqarsimasumi.
Arnaq naartunermini sapaatit akunnerisa 37-issanniippoq ernisulermallu erngiinnaq paasinarsisimavoq tassa ernisussanngortoq. Ajoraluartummilli angallammik Maniitsumut ingerlassissutissatut tulluuttumik Kangaamiuniittoqanngilaq. Taamaammat ’Bolatta’ angallat Targa 35-usoq Maniitsumiik aallertinneqarpoq.
- Nakorsaq peqqissaanermilu ikiorti angallamut aallersumut ilaatinneqarput. Ernineq Maniitsoq ungasigunnaarlugu pivoq. Anaanaasoq meerarlu tamarmik ajunngillat meerarlu 2.500 graminik oqimaassuseqarpoq, Qeqqata Peqqissaaviani nakorsaq qullersaat Ove Rosing Olsen Sermitsiaq.AG-mut oqarpoq.
Maanna ilaqutariinnguit nukappiararlu Maniitsup Peqqissaaviani uninngapput eqqaaneqareersutullu tamarmik ajunngillat. Ernineq naliginnaasumik pisarpoq naartunermi sapaatit akunnerisa 37-ssaata 40-ssaatalu akornanni.