nakuuserneq
Arfininngornikkut nakuusertoqarnerusarpoq
Nakuusertoqarneranik nalunaarutiginnittarnerit siornamut sanilliullugit aatsaat taama amerlatigipput. Ullunut agguaqatigiisissagaanni arfininngornikkut mianersornerusariaqarputit. Kisianni unnuami eqqissillutik angalaarsinnaavutit, politiit oqarput.
Politiit Ukiumoortumik 2016-imut nalunaarutaanni arfininngornikkut nakuusernerit nalunaarutigineqarnerusartut takuneqarsinnaavoq.
Arfininngornerup ingerlanerani nakuusertunut nalunaaruteqarnerit 180-t sinneqartut - sapaatip-akunnerisa ulluinut allanut sanilliullugu pingasoriaatingajammik amerlanerusut.
Nakuusertoqarneranik nalunaarutit inuit 100-iugaangata Danmarkimi oqartussat sisamanik nalunaarutinik nalunaarsuisarput, Kalaallit Nunaannilu nalunaaruteqarnerit 14-iusarlutik.
- Kalaallit Nunaanni kisitsisit amerlasoorujussuupput. Aap, nunat soorlu Zimbabwep qaffasissusaani inissisimavugut, politimesteri Bjørn Tegner Bay Sermitsiaq.AG-mut oqarpoq.
Taassumali arfininngornikkut unnuakkut qiimasuttoqarnerani ernumassutissaqannginnerarpaa.
- Paasivarput nakuusernerit nalunaaruteqartut amerlanertigut inuit imminnut ilisarisimasut akornanni pisartoq. Oqaatigineqarsinnaavoq angerlarsimaffinni eqqissiviilliornerusut, politimesteri oqarpoq, taassuma nassuiarpaa, nunanut allanut sanilliullugu tamanna pisartoq immikkuullarissuusoq.
- Sunngitsut aqqusiniinnarmi saassunneqartarnerat qaqutigoortorujussuuvoq. Unnuakkut qiimasuttoqarnerani angalaarnissaq ernumanartoqanngilaq, Bjørn Tegner Bay naqissusiivoq.
Taassuma neriniartarfinni imerniartarfinnilu nakuusertoqartarnera nassuerutigaa, kisianni qaqutigoornerarpai.