Arfineq-pingasunik ukiulik 160 km-imut pisuttoq

Arfineq-pingasunik ukiulik Belinda Olsen Augustussen sapaatip akunnerani uani Sisimiunut apuuppoq ajani Karla Lennert Hendrisen taassumalu uia Jens Kristian Hendriksen ilagalugit ulluni arfineq-pingasuni Kangerlussuarmiit Sisimiunut 160 kilometerit pisoreersimallugit. Pilersaarutigisimagaluarpaat ullut 13-14-it atussallugit.
Taamatut allappoq Sisimiut aviisiat sapaatip akunneranut saqqummersartoq Sivdlek´.
– Ajornaqaaq ilaararput piginnaaneqarnermik illuaqqamiit illuaqqamut pisuttarpugut. Affaannaa pisukkusunnani illuaqqamut apuuteqqaarusuttarami, taama oqarpoq Belinda Olsen Augustussenip ajaa, Karla Lennert Hendriksen.
Pisuttut sapaatiuppat aatsaat Sisimiunut tikinnissartik naatsorsuutigisimagaluarpaat, meeqqalli piginnaanikkaanera pillugu ullut tallimat sioqqullugit Sisimiunut tikipput.
Pisuttut ilaquttaminnik, anaanakkunnik, aanaakkunnik ilaqutaasunillu allanit Oqummiannguup tasianut naapigiarneqarput. Pisuttut Tuiusaannguakkulli nuimmata ilaqutaasut hurraartuullutik nillillattaalerput.
- Ææærh, aanani sapersillugu, aanaa pisuttartumik ernutaqarami pisulaarniarpoq, aanaasoq akornanni oqarpalullattaarluni perusivoq, naapigiaasunut tamanut quujatsatsitsisumik.
Parsiaasut qiimarrapput, pisuttullu qanilliartorneranni nippakkaluttuinnarlutik aallaat isiginnaartuulluni tussuumminarsinnaasumik pisuttut ajoratik tikimmata.
Belinda Olsen Augustussen ilamisulli pisattani nammineq nammallugit aqqutaani ingerlaarsimavoq.
- Nukik, nammattagalillarluni aqqutaani aqissernialeraangami, qaqqanut qallorluni. Ilaanni nammattagaa piilaaqqusariaqartarparput arpasaqattaaleraangat nukini sipaalaarniassammagit, Karla Hendriksen illaatigaluni naggasiivoq.
Belinda Olsen Augustussen aappaagu pisoqqissanerluni nalugallarpaa, aqqutaanili nuannisarsimaneqarluni unnerpoq.