ilisimatusarneq
- Arferup isikkut isigaaga
Malene Simonn Pinngortitalerivimmi Silap pissusaanut ilisimatusarnermut aqutsisoq sapaatip-akunnerata siuliani arferit qaammataasakkut nassitsissutinik atortulersuinermi immikkut misigisaqarpoq.
Malene Simon ukiuni kingullerni pingasuni qipoqqat- kigutilissuit tikaagulliusaallu 25-it sinnillit qaammataasakkut nassitsissutinik ikkussuiffigisarsimavai, sumiissutsinik ilisimatuunut nassiunneqartarput, taamaaliornikkut arferit ingerlaarfii malinnaavigisinnaavaat.
Ilisimasaq pingaarutilik
Paasissutissat uumasut amerlassusaannik ilisimatuut paasisaqartarput, tamanna pisassiissutissanik siunnersuiniarnermi pingaaruteqarpoq. Aammattaaq sumut ingerlaartarnerinik nerisaqartarnerinillu pissarsiffiusarlutik.
Malene Simonip immikkuullarissumik luftgeværimik sanasimavoq, arferullu qullasinnerpaatigut eqqorneqarnissaa pingaaruteqarpoq.
- Qaammataasakkut nassitsissutit arfernut ingeriunneqaraangata sakkortusinnaasarpoq. Arferit nipaarsaarluinnarluta qanillattorniartarneri suleriaaseraarput, Malene Simon Sermitsiaq.AG-mut oqaluttuarpoq. Taassuma oqaatigaa, pingaaruteqartoq misilittagaqarluartumik umiatsiamik aquttoqarnissaq.
Sulinerup nalaani, Tasiilap imartaani pisumi, ilisimatuut umiatsiamiitillutik sakkortuumik misigisaqarsimapput.
Igeriussisoqartoq
- Arfeq qanillattorparput. Nassitsissut amianut igeriukkakku niaqquni qummut saateriarlugu isiminik angisuunik toqqarlunga isigaaga, Malene Simon oqaluttuarpoq.
- Taasuuma kingorma allamut saariarluni ingerlaaqqilerpoq. Misigisaq taanna puiornavianngilaq. Uumasumik taamak angitigisumik isikkut toqqarluni isigisaqarneq misigisaq immikkuullarissuunerarlugu, ilaasut tamarmik isumaqatigiissutigaat, Malene Simon arfeq pillugu oqaluttuarpoq.
Arferup puinerani tamatigorluinnaq arferup sumiissusaa qaammataasamut nassiunneqartarpoq, tassanngaanniillu Nuummi Pinngortitalerivimmi Silap pissusaanut ilisimatusarfiup qarasaasiaanut ingerlateqqinneqartarlutik.
Allaaserisap ataani assit takukkit: