Arfernut nuttanngitsunut piniaqqusinnginnermik atsiornernik katersineq

Kalaallit Nunaata arferit sumiiffimmut ataatsimut ukiut tamaasa utikattartut, soorlu Nuup Kangerluanut, qanoq ililluni pissarsiaqarfiginerpaasinnaavai?

Arfeq toqunneqarluni kalaalimineerniarfimmut piguni, piniartumut ataasiaannarluni isertitaqartitsissaaq, najugaqartullu najukkameersumit nerisassaqalissallutik.

Illuanilli arfeq uumatiinnarneqaruni, ukiut tamaasa sumiiffimmut ataatsimut utertuassaaq, taamaalilluni annertunerusumik isertitaqartitsisinnaavoq takornarianut takusassaagami.

219-it atsiortut
Tamanna tunngavilersuutigalugu inuit 219-it maannamut atsiorsimapput, arferit utikattunik taagorneqartut Naalakkersuisunut illersoqqullugit qinnuigalugit, assersuutigalugu illoqarfinni anginerusuni takornariartitsinermik inuussutissarsiorfiusuni arfanniarnermut sumiiffinnik inerteqquteqarfiusunik aaqqiisoqarsinnaalluni.

Atsiortitsinernik katersisut naqissuserpaat, Kalaallit Nunaanni arfanniartarneq ileqquusoq tamakkiisumik tapersersorneqartoq. Kisianni inuiaqatigiit aningaasaqarnerannik isigalugu, arferit sumiiffinnut utikattartut piniarneqarunnaarnissaat paasinartoq.

Takuniarneqarluartartut
- Arferit Nuup Kangerluanut utikattartut takornarianit nuannarineqartumik akeqanngitsumillu takuniarneqarluartarput, ilaatigut takornarianut arfernik takusaanerup tuniniarneqarneranut atorneqarsinnaasimalluni. Taamaattumik 'takusarneqartareersut' aamma takusarneqartartussat ataasiakkaarlutik pisarineqartut takusarlugu pakatsinartorujussuuvoq.

- Inuiaqatigiinni takornariartitsisarnermik naatsorsuutigisaqarnissamik kissaateqarluni, takusarneqartartut asseqanngitsut arferit sumiiffimmut utikattuartut taakkua, illersorniarneqannginnerat ineriartortitsivigineqannginnerallu toqqaannartumik sianiilliornertut oqaatigineqarsinnaavoq, skrivunder.net atorlugu atsiorfigineqarsinnaasumi kajumissaamermi tamanna atuarneqarsinnaavoq.

Arferit arfinillit
Pinngortitaleriffiup arfernit assit 513-it 2007-mit 2009-mut Nuup Kangerluani assilineqarsimasut tunngavigalugit nalilerpaat, pingaartumik arferit aalajangersimasut arfinillit piffissami tassani assilineqarsimasut 50 procentiini pineqartut.

Atuaruk: Qipoqqaq – nerisassaq isiginnaagassarluunniit