Arfattassat inissinneqarput

Ukioq manna nunatsinnut 229-nik arfattassiisoqarpoq. Nunap immikkoortuinut pisassiissutissat agguataarneqarput tusarniaanerup kingorna, aammalu pisassiisarnermut gruppip KNAPK-mit, KANUKOKA-mit APPN-imillu ilaasortaqartup, inassuteqarneratigut. Naalakkersuisut nittartakkaminni taamatut allapput.

Pisassat imatut agguataarneqarput:

Tikaagulliusaat

2015-imi Kitaani pisassat 19-iupput. Angallatit tikaagulliusaarniarnissamut akuerineqarsimasunik akuerisaasunik teknikkikkut atortullit januaarip aallaqqaataanit decembarip 31-annut piniarsinnaapput.

Arfiviit

2015-imi Kitaani pisassat sisamaapput ( marluk + marluk 2014-imi pisassanit pisarineqarsimanngitsut).

Qipoqqaat

2015-imi Kitaani pisassat 12-uupput (qulit + marluk 2014-imi pisassanit pisarineqarsimanngitsut).

Tikaagulliit

2015-imi Kitaani pisassat 179-iupput (164 + 15-it, 2014-imi pisassanit pisarineqarsimanngitsut). Pisassiissutit agguataarneqarput angallatinut qamutililinnut 134-it, ataatsimoorlunilu piniagassatut 45-t. Angallatit qamutilillit ataatsimullu piniagassanik piniaqataasut tikaagullinnisarnissamut akuerisaasunik teknikkikkut atortullit piffissami marsip aallaqqaataanit novembarip 30-annut tikaagullinniarsinnaapput.

2015-imi Tunumi tikaagulliit 15-it pisassiissutigineqarput (12 + pingasut, 2014-imi pisassanit pisarineqarsimanngitsut). Ataatsimut piniagassanik piniarnermi peqataasut tikaagullinniarnissamut akuerisaasunik teknikkikkut atortullit piffissami marsip aallaqqaataanit novembarip 30-annut tikaagullinniarsinnaapput.

Arfanniarnissamut Naalakkersuisut piumasaqaataat pillugit annertunerusumik atuarit uani naalakkersuisut.gl