Nuuk
Arctic Winter Gamesip ingerlannerani meeqqanik paarsineq eqqorneqassanngilaq
Meeqqat atuarfianni atuartut Arctic Winter Gameseqarnerani qanoq sunnertitsigissanersut angajoqqaanit ernummatigineqarluni suli Kommuneqarfik Sermersuumut saaffiginnittoqartarpoq, ingerlatsivimmiilli pingaartinneqarpoq meeqqat paarineqarnissaat atuartinneqartarnissaallu
Arctic Winter Gameseqarnerata nalaani Nuummi meeqqat atuarfianni atuartut atuartitaanerminnik annaasaqassanngillat aamma paarineqartassapput.
Angajoqqaat Arctic Winter Gamesertoqarnerani meeqqat atuartut sunnerneqarnissaannut ernumassuteqartut kommunimut saaffiginnittarnerisa kingorna, Kommuneqarfik Sermersooq taama nalunaaruteqarpoq.
Ukiuunerani atuanngiffeqarneq sivisunerusoq
- Tamatumunnga tunngatillugu suliap inissinniarnissaa ilungersunarsimavoq, maannamulli angusarput isumaqarpugut kikkut tamarmik naammagisimaarsinnaagaat. Meeqqat tamarmik paarineqartarumaarput aamma atuartinneqartarumaarput, Kommuneqarfik Sermersuumi Atuarfeqarnermut Ulluuneranilu Meeqqeriveqarnermi neqeroorutinut ingerlatsivimmi pisortaq, Jesper Madsen taama oqarpoq.
Arctic Winter Gameseqarnissaa pissutigalugu Nuummi atuartut ukiuunerani sivisunerusumik atuanngiffeqartinneqassasut aamma paasissutissiissutigineqarpoq.
Tamannali atuartitaanngitsoornissaannik kinguneqassanngilaq. Ukiup atuarfiusup pilersaarusiornerani una pisussaq siumut eqqarsaatigineqareersimavoq, pisussarlu pissutigalugu piffissat pineqartut allanut nuunneqarlutik. Ukioq atuarfiusumi matumani atuartunut ullut atuarfissat 200-t anguneqassapput.
Nalunaarsimasunut paarsineq
Meeqqat atuareernermik kingorna ornittakkanut fritidshjemminulluunniit allatsissimasut annertunerusumik maluginavianngilaat, Sermersooq allappoq. Kommunimi atuarfiit amerlanerpaat Arctic Winter Gameseqarneranit sunnerneqarnavianngillat. Atuartut atuariartortartussaanngikkaluarlutik paarineqartassapput.
Taamaattorli Atuarfik Hans Lyngemi atuartut unammiuaarnerup nalaani paarineqarnissaannut periarfissaqassanngillat. Taamaammat meeqqat Qapiarfiusaami Illumi paarineqassapput.