Arctic Winter Games 2016
Arctic Winter Gamesimi amerlanerusunik medaljenannissaq neriuutigaat
2014-imi Fairbanksimi Arctic Wnter Gameseqarnerani Kalaallit Nunaat 60-inik medaljenappoq
Arctic Wnter Games upernaaru Nuummi ingerlanneqarpat Kalaallit Nunaat qassinik medaljenassava?
Apeqqut apeqqutissaqqissuuvoq. Akissutissaali nalunarpoq.
– Neriuutissaqarsinnaavugut suli amerlanerusunik pissarsiumaarluta, Kalaallit Nunaanni Timersoqatigiit Kattuffianni generalsekretær Carsten Olsen tusagassiorfinnut nalunaarutikkut erseqqissaavoq.
Ukioq manna 135-t
Ukioq manna Nuummi unammiuaarnissani Kalaallit Nunaat timersortartunik 135-inik peqataatitaqassaaq, ukiut marluk matuma siornatigut 107-inik peqataatitaqarsimalluni. Sanilliussassatulli oqaatigineqarsinnaavoq 2002-mi, AWG kingullermik Nuummiimmat, Kalaallit Nunaata timersortartut 164-it unammeqatigitikkai.
Alloriarfik
Qanorluunniilli angusaqartoqassagaluarpat timersoqatigiit kattuffiata neriuutigaa unammiuaarnerit peqataasunut alloriarfiujumaartut.
– Timersortartut angusaat sammineqartorujussuussapput. Annertuunik misigisaqarnissarput kissaatigiitigalugu aamma neriuutigaarput amerlasuut imminnut ineriartortinnissaminnut inuunerminnilu nutaanik angusaqarniarnerminni Arctic Winter Games alloriarfittut atorumaaraat, generalsekretær tikkuaavoq.
Tatineqarneq
– Peqataasut tatineqartutut misigisimanerat pissusissamisuuginnarpoq. Amerlaqaagummi angusaqarniarnitsinni annilaanganaveersaartarsimasut. Tassaasinnaavoq soraarummeernermi, atorfininnissamik oqaloqateqarnermi imaluunniit maannakkutut aWG-mi - finalimut anngussinnaalluni. Tassa alloriarfissaq. Misilittagaqlerluni, taamaasilluni timersortartut ataasiakkaat siunissami pisussani nukittunerusumik inissisimasalissallutik, taanna oqarpoq.