Arctic Winter Games

Arctic Winter Games nutaamik qullersartaarpoq

Arctic Winter Gamesip nunani tamalaani ataatsimiititaliaani siulittaasoq tunuarpoq

Jens Brinch Arctic Winter Gamesip nunani tamalaani ataatsimiititaliaani 1998-miit ilaasortaavoq

Siornatigut timersoqatigiit kattuffianni GIF-mi allattaaneq Jens Brinch Arctic Winter Gamesip nunani tamalaani ataatsimiititaliaani siulittaasutut toqqarneqarpoq. Tamanna pivoq siulittaasuugaluartoq Gerry Thick Yukonimeersoq ukiut 30-it Arctic Winter Gamesip nunani tamalaani ataatsimiititaliaani sulereerluni tunuarmat.

Arctic Winter Gamesip nunani tamalaani ataatsimiititaliaa tassaavoq Arctic Winter Gamesimi oqartussaasut qullersaat. Martsimi Arctic Winter Games Fairbanksimi ammarneqarmat ammaanermi oqalugiaat Alaskameersumut Wendell Schefflerimut Gerry Thickip isumagisassanngortippaa. Maannalu tassa nalunaarpoq Arctic Winter Gamesip nunani tamalaani ataatsimiititaliaanit tunuarluni.

Takuuk: Assit: Arctic Winter Gamesimi ammaanersiorneq

Siuttoq maluginiagassaq
Jens Brinch Arctic Winter Gamesip nunani tamalaani ataatsimiititaliaani siulittaasutut toqqarneqarpoq John Roddalut siulittaasup tulliatut toqqarneqarluni.

- Gerry Thickip Arctic Winter Gamesimut tunniussaa imaannaanngeqaaq. Tunniusimanera, siulersuinera, inuttaata pitsaalluinnartumik ingerlassimasai, Arctic Winter Gamesimut sunniuteqarluarsimapput Arctic Winter Games avannaarsuani innuttaasunut sunniutilittut inissisimatilerlugu. Gerry Thickip immikkuullarissumik suleriaasia, tunniusimanera Arctic Winter Gamesimullu tapersersuinera maqaasissavavut, Jens Brinch oqarpoq.

Jens Brinch Nunatsinni sulinermi saniatigut nunani tamalaani timersorneq pillugu politikkimi suliaqarpoq. Suliniaqatigiiffik Play the game siulittaasuuffigisimavaa taannalu tassaavoq nunarsuarmi timersornerup silarsuaani naapertuilluarnissamik ammasumillu paasissutissiisarnissamik sulissutiginnittoq.

Maanna Arctic Winter Gamesip nunani tamalaani ataatsimiititaliaani siulittaasunngorpoq tassanilu 1998-miit ilaasortaasimavoq.

- Assorsuaq tulluusimaarutigaara suleqatigisanni suliassamut pingaarutilimmut toqqagaanera. Tassanimi suliarisussaavavut avannaarsuarni issittumilu timersornerup ineriartortinnissaa, Jens Brinch oqarpoq.

Arctic Winter Games pillugu allaaserisat uani atuakkit

Powered by Labrador CMS