AWG-mut piareersarneq
Arctic Winter Games angerlarsimaffinnit sofamit malinnaaffigiuk
KNR issittumi unammiuaartitsinerit pisut annertunerpaartaat radiokkut, tv-kkut aamma nittartakkakkut aallakaatissavaat
Nuummi Arctic Winter Gamesip ingerlanneqarneranut atatillugu KNR annertuumik aallakaatitsiniarpoq, tassani Kalaallit Nunaata oqaluttuarisaanerani timersornikkut aaqqissuussat annersaat radiokkut, tv-kkut, nittartakkakkut kiisalu inuit attaveqatigiittarfiitigut malinnaaffigineqassapput.
Radiokkut tv-kkullu aallakaatitsisarfik taama paasissutissiivoq
Radio
KNR Radio timersornermik aaqqissuussat siammasissumik aallakaatitsiffigissavai.
Ullaakkut aallakaatinneqartartoq Nunatta Nipaa ullaat tamaasa ullormut pisussanik aallakaatitsisarniarpoq ullaa tungaani ualikkullu timersornermik aallakaatitsisartut Uju Petersen Finn Nielsenilu toqqaannartumik pisoqarfinniit assigiinngitsuniit aallakaatitsisassapput, inerniliussanik angusanik medaaliannatsisoqartillugulu aamma malinnaatitsisarumaartunik.
Kulturikkut aaqqissuisoqarfimmiik kulturikkut pikialaartunik timersornerminngaanniit aallakaatitsisassapput.
TV
KNR TV-mi timersuutit assigiinngitsut sisamat angullugit ullormut malinnaaffeqartarsinnaassaatit. Aallakaatitaq siulleq toqqaannartoq aallakaatinneqassaq Qinngutsinni sisoraaserluni ooqqattaasarneq ingerlatsiffimmiit ataasinngorneq marsip arfineq-aappaat.
Unnuit tamaasa ullormut pisut katersorlugit tigulaariffigalugit AWG-mi pisunik aftenshowimi malinnaasinnaasassaatit Arctic Winter Gamesertoqarnera tamaat ingerlanneqartartussami.
Arctic Sport Nuuk TV peqatigalugu aallakaatitassiami malinnaasarsinnaavutit KNR2-kkut sapaatip akunnera naallugu.
KNR.gl
KNR.gl live-mi paasisat kingulliit ilanngullugit ullormut timersornikkut pinnguaatininngaanniit takussutissiisoqartassaaq, tusagassiortut aallartitat isiginnaagassiaaqqanik takutitsisassapput TV-kkut aallakaatitanik tigulaaralutik saniatigullu asserpassuarnik peqataasuniit isiginnaartorpassuarniillu.