nerrivimmi arsaararneq
Arctic Table Tennis Championshipimi ujaminnattaarpassuit
Kalaallit Nunaat unammiuaarnermi kuultinnallunilu, sølvinnallunilu bronzennappoq, ingammik Ivik Nielsen angusaqarluarpoq
Kalaallit nerrivimmi arsaarartartut arlaqartut Arctic Table Tennis Championshipimi Reykjavikimi Islandimi, maajip 14-anit 16-anut ingerlanneqartumut peqataapput. Nunat peqataasut tassaapput Island, Savalimmiut aamma Kalaallit Nunaat.
Nunanut allanut unammisartut sungiusaasuata Tommy Jørgensenip inresimasut nunanut allanut unammisartut uku toqqarsimavai, Rosa-Marie Petersen, Inngili Petersen, Melissa Larsen, Poul Jørgen Petersen, Aqqalu Nielsen aamma Ivik Nielsen, sungiusaasullu ikiortaa Bodil-Mona Frederiksen.
Timersoqatigiiffiit marluk peqataasut
Nunanut allanut unammisartut saniatigut timersoqatigiiffiit marluk qaaqqusaapput, Ukalitsiaq 93 Ittoqqortoormiineersut aamma K-1933 Qaqortumeersut. Taakku timersoqatigiiffiit immikkut unammisartunik pingasunik ammasumik unammisitsinermi peqataatitaqarput.
Ujaminnattaarpassuit
Kalaallit Nunaata ujammit uku pissarsiarai:
- Angutit ataasiakkaarlutik unammineranni Ivik Nielsen pissartanngorpoq, Aka-Mark Møllerilu K-1933 bronzennappoq.
- Angutit marlukkaarneranni qatanngutigiit Ivik Nielsen aamma Aqqalu Nielsen kuultinnapput. Qatanngutigiit Nielsenikkut Islandimi angutit marlukkaarneranni pissartat, Daði Freyr Guðmundsson aamma Magnús Finnur Magnússon ajugaaffigaat.
- Arnat marlukkaarneranni Bodil-Mona Frederiksen aamma Rosa-Marie Petersen sølvimik ujaminnapput. Islandimi pissartanut, Guðrún G Björnsdóttirimut aamma Aldís Rún Lárusdóttirimut naligiiffiusumik unammereerlutik ajorsarput.
- Akuleriilluni marlukkaarnermi Ivik Nielsen aamma Melissa Larsen kuultinnapput, Islandimi pissartat Guðrún G Björnsdóttir aamma Daði Freyr Guðmundsson ajugaaffigigamikkit.
- Aamma akuleriilluni unamminermi Aqqalu Nielsen Inngili Petersenilu bronzinnapput.
- Holdikkaarluni angutini pissartanngorniutivinnermi kalaallit nunanut allanut unammisartui Ivik Nielsen, Aqqalu Nielsen aamma Poul Jørgen Petersen kuultinnapput, taakku Islandermiut nunanut allanut unammisartui angutit 3-2-mik ajugaaffigaat.
- Holdikkaarluni arnani nunanut allanut unammisartut Melissa Larsen, Inngili Petersen aamma Rosa-Marie Petersen bronzinnapput.
Ukiorpassuarni angusat pitsaanerpaat
- Uani unamminermi unammisartut kalaallit nerrivimmi arsaarartarneranni ukiorpassuarni angusat pitsaanerpaat anguaat. Arnanik pingasunik nutaaqqinnaanik nunanut allanut unammisartunik sassartitsivugut, taakkulu angusarissaarput, angutit unammisartut aamma qaaqqusat angusarissaarluarput, sungiusaasoq oqarpoq.
Atuaruk: Nunatta nerrivimmi arsaaratartuini neriunaatilittaa naapiguk
- Ivik Nielsen immikkut taassallugu soorunami avaqqunneqarsinnaanngilaq, taanna Savalimmiormiut aamma Islandermiut unammisartuinut pitsaanerpaanut ajorsanngiivilluni unammivoq. Tamanna pitsaalluinnartuuvoq, nunanut allanut unammisartunut sungiusaasoq Tommy Jørgensen tusagassiuutinut nalunaarummi naqissusiivoq.