Arctic Green Foodip pisortaata taarsiissuteqarnissaa namminersorlutik oqartussat piumasaraat

Arctic Green Foodip pisortaat Charles Kastberg Christensenip 4,9 millioner koruunik taarsiissuteqarnissaa namminersorlutik oqartussat piumasaraat. Aningaasat taakku Arctic Green Foodimut 2013-mi tunniunneqarput sullissinissamut isumaqatigiissusiortoqarneranut atatillugu. Maanna namminersorlutik oqartussat aalajangerput suliaq eqqartuussivimmut ingerlateqqinniarlugu.

Arctic Green Foodip akiliisinnaajunnaarnera februar 2013-mi eqqartuussivimmi nalunaarutigineqarpoq akiliisinnaajunnaartutullu nalunaarutigineqarnissaq suliffeqarfiup nammineerluni kissaatigisimavaa.

Arctic Green Food akiliisinnaajunnaarneq sioqqullugu namminersorlutik oqartussanit 4,9 millioner koruuninik tunineqarput sullissinissamut isumaqatigiissusiornermut atatillugu tassanilu ilaatigut piumasaqaataavoq tunitsiviit arlallit ammatinneqassasut. Tunitsiviilli namminersorlutik oqartussat nalunaarutaat malillugu piffissami sivikinnerusumi sivisunerusumiluunniit ammatinneqarsimanngillat.

Katitigaaneq paasiumaatsoq
- Namminersorlutik Oqartussat isumaqarput ingerlatsiviup kiffartuussinermut isumaqatigiissut naammassiniarlugu iliuuserisimasai arlaqaqisut isornartuusut, soorlu ingerlatsiviup katitigaasimanera, tamatumani ingerlatsiviup aningaasartuutigisimasai paasiuminaassimaqalutik, namminersorlutik oqartussat Charles Kastberg Christensenimit taarsiiffigitinnissamik piumasaqaammik nalunaaruteqarnerminni allapput.

Pisimasup eqqartuussivimmi suliarinera iluatsillugu pisimasut nassuiaqqissaarneqarnissaat namminersorlutik oqartussat piumasaraat.

- Eqqartuussivimmi nassuiaassutigineqassaaq erseqqissaassutigineqassallunilu Arctic Green Food A/S-ip akiliisinnaajunnaariartornera, siumoortumillu akiliutigineqarsimasut atorneqarneri immikkut sammineqassallutik, namminersorlutik oqartussat nalunaarput.

Nunatsinni eqqartuussinissaq piumasaraat
Namminersorlutik oqartussat pisimasunik paasinninnertik nalilersoreerlugu Charles Kastberg Christensenip taarsiissuteqarnissaanik piumasaqarnissaq aalajangiunneqarpoq.

- Namminersorlutik Oqartussat isumaqarput pisortaq Charles Kastberg Christensen, siumoortumik akiliutigineqartut nalaanni, ingerlatsiviup pisortaasa ilaattut nalunaarsimanngikkaluartoq, akiliutigineqartut atorneqarneri tamaasa aalajangiiffigisarsimagai. Taamaattumik Charles Kastberg Christensen taarsiisussanngortillugu piumaffigineqassaaq, namminersorlutik oqartussat nalunaarput ilanngullugulu piumasaraat eqqartuussivimmi suliarineqarnera Nunatsinni pissasoq.