ACR
Arctic Circle Racemut peqataasussat allamiut marloriaammik amerlanerusut
Campip inissinniarneqarnerani sila kinguaattoortitsivoq, kisianni amerlanerpaartaat maanna isaarrannissamut piariingajalerput
Arctic Circle Racemut piareersarnerit apeqqutigigaanni Jens Klaus Lennert isumalluarpaluppoq.
- Ajunngitsumik ingerlavoq. Arpannissarmi sioqqullugu ulapittoqartuaannarpoq, ACR-mut siulittaasoq oqarpoq.
Nunanit allameersut 90-t
Nunarsuarmi ujakkaarluni sakkortunerpaannut tunngatillugu sila arlaatigut apeqqutaajuaannarpoq. Ukiormanna piareersarnerit eqqorneqarput, tassami kajumissutsimik suleqataasorpassuit sapaatip-akunnerata naanerani kingullermi campimut piareersarnerit aatsaat aallartissinnaasimammatigit.
- Kisianni maanna toqqit anginerit nappareerpagut, toqqillu mikinerit unnuiffissat nappartitileruttorpagut, Jens Klaus Lennert oqarpoq.
Ukiormanna arpannermi 211-t peqataassapput, taakkunanngalu 90-t nunanit allaneersuupput. Taakku nunanit allanit peqataasut siornarmut sanilliullugu marloriaammik amerlanerupput. Ukioq manna erfalasut 16-t aallarfimmi nivingatinneqassapput.
FIS-mit arpanneq
Kalaallit Nunaanni siullermeerluni aatsaat nunani tamalaani sisorartartut kattuffianit FIS-mit akuerisamik ullumi arpattoqalermat arpanneq aallarnisarneqassaaq.
Arpattut arpannermut peqataanerminni FIS-pointinik pinnassinnaanerannik tamanna isumaqarpoq.
- Neriuppugut tamanna attatiinnarsinnaassallugut, taamaalilluta arpattartunik tusaamasanik kajungilersitsiniassagatta, Jens Klaus Lennert oqarpoq.
Arctic Circle Race aamma FIS-ip ullorsiutaanut ilannguppoq, tamannalu nunanit tamalaanit soqutiginnittoqalerneranut pissutaqataavoq.
Aappaagu arpannermut peqataanissamut nalunaarnerit ullumikkut ammareerput.