Arctic Circle Racemi peqataanerminut innersuunneqartoq

Tappiitsoq Arne Christensen Aprilimi, taamani 62-nik ukioqarluni, nunarsuarmi arpalluni ingerlaarfik sakkortunerpaatut nalunnginneqartoq Arctic Circle Race peqataaffigaa. Peqataaneralu sapiitsuliornertut isiginiarneqarneratigut Danmarkimi Kultureqarnermut ministereqarfiup Innarluutilinnut timersortartunut nersornaasiuttagaanut innersuunneqarpoq. Nersornaat 100.000 koruuninik aningaasartaqartoq.

- Arne Christensen, sisorartartoq, silarsuarmi sakkortunerpaat ilagisaannut Arctic Circle Racemut 160 kilometeriusumut peqataanermigut takutitsilluarnerata Danmarkimi Kultureqarnermut ministereqarfiup Innarluutilinnut timersortartunut nersornaasiuttagaanut innersuunneqarpoq, Danmarkimi ministeriaqarfik tusagassiuutinut nalunaarummi allappoq.

Arctic Circle Race 20-ssaat aprilip qaammataani ingerlanneqarpoq. Sisimiut eqqaani ingerlaafik 160 kilometeriusoq Arne Christensenip ingerlaaqataaffigaa. Ullunilu pingasuni akunnerit 22-t sinnerlugit ingerlaarfigereerlugu apuukkiartornerani isiginnaartunit nuannaatsatsitsisunik tikilluaqquneqarpoq.

Atuaruk: Tappiitsup peqataasup Arctic Circle Race naammassivaa

Unammeqataasuni 60-t sinnerlugit ukiulinni pitsaanerpaatut inissisimavoq peqataasunilu 159-usuni 110-nngorluni.

Nersornaat 100.000 koruuninik aningaasartaqartoq innarluutilimmut timersornikkut siuarsaaqataasumut tunniunneqartarpoq.