Arctic Circle Race silarlunnera pissutigalugu taamaatiinnarneqartoq

Arctic Circle Racemut ukioq manna peqataasut tamarmik Sisimiunut utersimalerput sapaammi ingerlaarnissaagaluaq aaqqissuisunit taamaatiinnarneqareersorlu. Taamaatitsiinnarnissamik aalajangerneq sapaammi ullaakkut siusissukkut pivoq anorlerpallaarnera silallu navialiffiusinnaanera pissutigalugit. Tamanna oqilaniutsitsinermut nittartakkami pisortatigoortumi acr.gl-imi atuarneqarsinnaavoq.

Anori ilanngullugu -40 gradinik issittoq

Sapaammi anorlerneranit Sisimiut timaani 160 kilometerinut ingerlaarnerup ullormut immikkoortortaata ingerlanneqarfigisassaani -40 gradinik issittutut misinnarpoq.

Arctic Circle Racep komitea silap sualuppallaarnera tunngavigalugu sapaammi ullaakkut nal. 07.30 aalajangerpoq ullormut ingerlaarfissaq taamaativinniarlugu.

Oqilaniutsitsisunit oqaaseqartartoq Mads Nordlund taamaatitsiinnarneq pillugu Sermitsiaq.AG-mut ima oqarpoq:

- Perserneranik isikkiveqannginneranillu kingunilimmik anorlernera pissutigalugu taamaatitsiinnarnissamik aalajangerneq eqqortuuvoq. Ingerlaannartoqarsimagaluarpat tamanna inuunermut navianartorsiorfiusimassagaluarpoq. Ippassaq pujornera pissutigalugu aamma isikkivilulluinnarpoq, kisianni ullumi aputip, persernerata anorillu kinguneranik ingerlaarnissaq ajornarluinnarpoq, Mads Nordlund oqarpoq.

Peqataasut tamarmik ajoratik utersimalersut aqutsisunit oqaatigineqarpoq, taamaattorli atortut ilarpaalussui assersuutigalugu toqqit anorersuarnerata kinguneranik annaaneqarsimallutik.

Ulluni aggersuni nutaarsiassaqassaaq

ACR ullut tulliuttut ingerlaneranni oqilaniutsitsineq, sapaammi ingerlaarnissaq suli aallartinngitsoq unitsiinnarneqartariaqalersoq, pillugu nutaarsiassaqartitsissaaq.

Ujaminnatsitsineq kinguartinneqartoq

Aaqqissuisut neriorsuipput ujaminnatsitsineq ingerlanneqassasoq, kisiannili silarlunnera pissutigalugu tamanna ataasinngornermi unnukkumut kinguartinneqartoq.

Sapaammi taamaatitsisariaqalernerup kinguneranik ujammit tallimanngornermi arfininngornermilu angusat tamarmiusut tunngavigalugit tunniussuunneqassapput, Mads Nordlund ACR-imeersoq oqarpoq.