Aqutsisoqarfimmi pisortaq Nunaoilimi siulittaasunngussaaq

Nunaoil A/S-p siulittaasua, Frank D. Pedersen, siulersuisunit oktobarip aallartilaarnerani tunuarpoq. Tamanna pivoq Frank D. Pedersenip Naalakkersuisut siulittaasoqarfianik Nunaoil A/S-ip 2017-imiit tapiissuteqarfigineqaqqulluni kissaateqartareernerata kingorna.

Frank D. Pedersenip tunuareernerata kingorna, siulersuisunut ilaasortaq ataaseq minillugu, siulersuisut sinneri ataatsimeeqatigereerlutik ingerlaannartumik atuutilersumik aamma tunuarput.

Tamatuma kingorna Naalakkersuisuungallartut Nunaoil A/S-ip siulersuisoqarnermikkut ajorluinnartumik inissinnerani qanoq aaqqiissuteqarniarnersut nalornissutigineqarsimavoq.

Atuaruk: Nunaoilimi aalassassimaartoqarpoq: Siulersuisut ingerlaannartumik tunuartut

Atuaruk: Nunaoil: IA-p partiit siulittaasui ataatsimeeqatigiitsikkusuppai

Oberstip Nunaoil siunissami siuttuuffigilissavaa
Kisianni tassa kiisami maanna Nunaoilimi immikkut ataatsimeersuartoqarnissaanut aggersaasoqarpoq, siulersuisuusimasummi taartissaannik piukkunnartunik maanna nassaartoqarsimavoq.

Nunaoil A/S taama allappoq.

Siulersuisunut tunuartunut taartissanut nutaat siunnersuutigineqarput sisamat, tassaasut Lars Dencker, Helga Sofie Jakobsen, Kunuk A. Olsen aamma Lone Nukaaraq Møller.

Lars Dencker, oberstitut tunuliaqutaqartoq, kiisalu Aningaasaqarnermut Sulisoqarnermullu Aqutsisoqarfimmi 2012-miilli pisortaasimasoq Nunaoilimi siulittaasussatut innersuunneqarpoq.

Atuaruk: Nunaoil: Siulersuungallartussat ivertinneqalerunarput