peqatigiiffiit

Aqumiut peqatigiiffeqalerput

Atorfillit Kattuffiat aamma Kalaallit Aqumiut Peqatigiiffiat isumaqatigiissuteqarput kilisaatini aqumiut Atorfillit Kattuffiannut ilaasortanngorsinnaalersut

Kilisaat Polar Princess. Assi toqqorsivimmit

Kilisaatini inuttat, kilisaatini naalakkat, aquttut, igasut, maskinmesterit allallu aqumiutut taaneqartartut, Atorfillit Kattuffiannut (AK) ilaasortanngorsinnaalerput. Tamanna pivoq AK-p aamma Kalaallit Aqumiut Peqatigiiffiata (KAP) isumaqatigiissuteqarnerisigut.

– Tassaapput inuit 400-niit 500-nut amerlassusillit, kilisaatini sulisut peqatigiiffeqanngitsut imaluunniit kattuffeqanngitsut. Tamakkua isumaqatigiissuteqaratik inatsisinillu illersorneqaratik sulipput, Atorfillit Kattuffiat tusagassiorfinnut nalunaarutikkut allappoq.

Manna tikillugu kilisaatini inuttat akissarsiatigut aammalu atorfinitsitaanermut isumaqatigiissut malillugu sulinermi atugassarisatigut taamaallaat sulisitsisumik piumasaqaataat malillugit sulisarput. Maanna isumaqatigiissutinik isumaqatigiinniartoqarsinnaalerpoq, Atorfillit Kattuffiat nalunaarpoq.

Isumaqatigiissut nutaaq

Atorfillit Kattuffiat isumaqarpoq kilisaatini inuttat sulinerminnut kattuffeqarnikkullu maanna inatsisitigut illersorneqalersut.

– Maanna Atorfillit Kattuffiat KAP-lu isumaqatigiissummik nutaamik sanapput, tassuuna qulakkeerneqassalluni kilisaatini inutat sulinerminni aaqqissuussaanerusumik atorfeqartitaanissaat, Atorfillit Kattuffiat nassuiaavoq.

Maanna SIK, AK aamma KAP, kilisaatini inuttanut tamanut akissarsiatigut atugassarisatigullu isumaqatigiissummut sinaakkutassanik pilersitsinissamik isumaqatigiissuteqarput, tamakkua siunissami kattuffimmi ilaasortaasinnaalersinniarlugit.

Powered by Labrador CMS