Aqqusinniorneq Qaqortumi suliffissaqartitsissaaq

Inatsisartut akileraartarnermut aningaasaqarnermullu ataatismiititaliaata 20,025 millioner koruuninik aningaasaliinissamut qinnuteqaat akueraa. Aningaasat Qaqortumi 6 kilometerinik takissusilimmik aqqusinniornissamut atorneqassapput. Kommune Kujalleq tapiiffigeqqulluni saaffiginnimmat Naalakkersuisunit ilalerneqarpoq.

Atuaruk: Qaqortumi mittarfiliornissamut aningaasaliisoqarnera nuannaarutigineqartoq

Ineqarnermut naalakkersuisoq Siverth K. Heilmann Atassummeersoq, inuussutissarsiornermut, aatsitassanut sulisoqarnermullu naalakkersuisoq Jens-Erik Kirkegaard Siumumeersoq aamma peqqissutsimut attaveqarnermullu naalakkersuisoq Steen Lynge aningaasaliisoqarnissaanik Inatsisartut akileraartarnermut aningaasaqarnermullu ataatsimiititaliaanut qinnuteqaammik tunniussisuupput.

Mittarfik eqqaaneqanngilaq
Kommune Kujalleq suliffissaaleqinermit eqqugaavoq maajimi suliffissaaleqisut 521-it nalunaarsorneqarsimallutik.

Atuaruk: Qaqortumi timmisartoqarfeqalernissaa akilersinnaava?

- Qaqortumit aallartittumik aqqusinermik 6 km-itut isorartutigisumik sanaartortoqalerneratigut nalilerneqarpoq suliffissanik pilersitsineq annertungaatsiassasoq, nunagissaalluni beton-ilerillunilu sulinermi, matumani suliassaq annertunerpaatigut taamaassammat, atortussanik avataaniit pissarsiniartariaqarneq annikitsuinnaassammat (qaartiterutit aammalu cementi) suliassat sinneri sumiiffimmi suliarineqartussaallutik, Naalakkersuisut tusagassiutinut nalunaarummi allapput.

Kommune Kujalleq nalunaareerpoq aqqusineq sananeqartussaq tassaasoq mittarfissamut erinitsaanneqartumut aqqusinissaq. Naalakkersuisulli nalunaarumminni mittarfissaq oqaatsimik ataatsimilluunniit eqqaanngilaat taamaallaat oqaatigalugu aqqusinniornikkut Qaqortup illoqarfittut ineriartoqqinnissaa periarfissinneqassasoq.

Suliffissaaleqisut suliassaat
Qaqortumi mittarfiliornissamut aalajangiiffigisassatut siunnersuut Naalakkersuisut Inatsisartunut saqqummiuteqqaartussaavaat ilimagineqarporlu ukiormanna ukiaanerani katersornermi tamanna piumaartoq.

Pilersaarutaavoq Qaqortumi mittarfissaq 2018-mi atoqqaarfissiorneqassasoq. Maannalu tassa nivariarneq siulleq pisussanngorpoq suliffissaqartitsinermik kinguneqartussaq.

- Kommune Kujalleq erseqqissaateqarpoq, suliap ingerlanneqarnerani suliffissaaleqinermik eqqugaasimasut suliassaqartinneqarnissaat ilinniartullu ilinniaatigalutik sulisinneqarnissaat pingaartinneqassasoq, soorluttaaq pikkorissaanerit ingerlanneqassasut, siunissami suliassani annertuuni suleqataalerumaartussat piginnaasaasa annertusarneqarnissaat siunertarineqarluni, Naalakkersuisut nalunaarput.