aaqqissuusseqqinneq
Aqqissuusseqqittoqalersoq: Amerlanerit sulissapput
Pisortat ikiorsiissutaanit pisartagaqarnermit sulineq imminut ikilersinnaanerulissaaq. Ajornartorsiullu iliuuseqarfigineqassappat aaqqissuusseqqittoqartariaqarpoq, naalakkersuisullumi Vittus Qujaukitsup suliniut aallartereerpaa.
Pisortat ikiorsiissutaannit pisartagallit ullumikkut sulileqqissagunik akisunaarsinnaasarpaat.
Isertitat annikillivallaartarput apeqqutaasarlutilli ineqarnermut sillimmasiussaq meeqqanullu tapit amerlassusaat.
Ajornartorsiut annertuvoq
Akileraarutinut atugarissaarnermullu ataatsimiititaliap professori Torben M. Andersen siulittaasoralugu 2011-mi nalunaarusiami saqqummertumi Kalaallit Nunaanni ajornartorsiutit iliuuseqarfigineqanngippata inuiaqatigiinnut aningaasaqarnermullu kinguneqarnerlussasoq oqariartuutigineqarpoq.
Inuiaqatigiit atugarissaarnerat ataqatigiissaaneqanngilaq. Aningaasaqarnermi ajornartorsiutit annertusiartuinnassasut ataatsimiisitaliaq 2011-mi oqariartuutigigamikku Nunatsinni politikkerit qanoq aaqqeeriarsinnaanerannut arlalinnik siunnersuuteqarput.
Ataatsimiisitaliamik annertuumik aarlerisaarisoqaraluartoq nalunaarusiaq ukiuni arfinilinni uninngatinnarneqarsimavoq. Taakkunani ajornartorsiutit taakkartorneqartut politikkerip arlaannaataluunniit piumassuseqarluni iliuuseqarfigisimanngilai.
Suleqatigiissitat marluk pilersinneqarput
Suliffeqarnermut naalakkersuisoqarfiup Vittus Qujaukitsoq siuttoralugu oktoberimi suliniummik aallartitsipput. Tassani suleqatigiissitat marluk pilersinneqarput novembarillu 16-ani siullermeerluni ataatsimeeqatigiittoqarluni. Taakku ataatsimiisitaliap 2011-mi aarlerisaarutai iliuuseqarfigisussanngorpaat.
Suleqatigiissitat pilersinneqartut suliassaaleqinaviarunanngillat. Inatsimmut allannguutissatut siunnersuut ajornartorsiummullu aaqqiissutissatut siunnersuutit martsip arfineq-aappaanni saqqummiunneqassapput. Tassa ajornartorsiuterpassuit ataatsimiisitaliap tikkuartornikuusaannut aaqqissutissanut alloriarneq siulleq pissalluni.
Suleqatigiissitat inuttalersorneri assigiinngiiaartiterput. Taakku naalakkersuisoqarfinnit assigiinngitsunit suliffeqarnermullu suliaqartunut sulisoqarlutik.
Aporfiit inissinneqassapput
Suleqatigiissitat aappaat "Uummarissumik inissaqartitsisumillu suliffeqarfinnut suleqatigiissitaq" taaguutilik "Kalaallit Nunaanni innuttaasut atugarissaarnermut ineriartortitseqataanissaannut" suliakkerneqarput
Suleqatigiissitallu suut suliffeqanngitsunut suut aporfiunersut misissuiffigissavaat. Ilaatigut ukua misissoqqissaarneqassallutik:
- Pisortanit ikiorsiissutit
- Ineqarnermut tapit
- Piginnaanngorsaaneq
- Attuumassutillit allat
Ilinniartut suliffinnillu misiliisut
Suleqatigiissitap aappaa "Ilinniartut amerlanerusut praktikkerfissaqarnissamullu qulakkeerinissamut suleqatigiissitaq" taaguuteqarpoq. Taakku pisortat suliffeqarfiutaanni qanoq amerlatigisunik ilinniartunik praktikkertoqarsinnaanera misissuiffigalugulu nalilersuiffigissavaat. Misissuinerup siunertaraa aalajangersaanerup suliffeqarfinnut tamanut atuutsinneqassanersoq imaluunniit aaliangersimasuinnarnuussanersup paasiniarneqarnissaa.
Inatsisartut suleriaasianni paragraf 37 naapertorlugu Karl-Kristian Krusep (S) apeqquteqarneranut Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu allanut Naalakkersuisup Vittus Qujaukitsup "Naalakkersuisoqarfiit arlallit akornanni suleqatigiissitap inuussutissarsiornermi susassaqaqatigiit peqatigalugit maanna misissorpaat pisortanit ikiorsiissutit atortinneqarneranni ajornartorsiutaasut, soorlu ineqarnermut tapiissutit, meeqqanut tapiissutit ajornartorsiutillu allat" paasissutissiissutigaa.
Suliaq taanna ingerlanneqarpoq sulinissamut kajumissaateqartuaannarnissaa qularnaarumallugu, pisortanit ikiorsiissutinik assigiinngitsunik pisartagaqartarnermut taarsiullugu, Vittus Qujaukitsoq allappoq suleqatigiissitallu suliai ukiaru ataatsimeersuarnermi 2017-imut inatsisitigut siunnersuutinik kinguneqarnissaat naatsorsuutigineqartoq oqaatigalugu.