ujaasineq
Aqqartartut innap sisooqqissinnaanera pissutigalugu ujaasinaveertut
Malissuaqarnerani Nuugaatsiarmiut sisamat ilanngussaasimanissaat aarlerigineqarpoq. Innalli sisooqqeratarsinnaanera pissutigalugu aqqartartut ujaasitinneqarsinnaanngillat.
Arfininngormat malissuaqarnerani illut aqqanillit imaanut amuneqarnerisigut Nuugaatsiarmiut sisamat ilanngussaasimanissaat aarlerigineqaraluartoq, nassaariniarnissaat suli sulissutigineqanngilaq.
Sakkutuut imarsiortut aqqartartui sumiiffimmiikkaluarput, umiarsuarmili alapernaarsuummi Vædderenimi naalagaq, kommandørkaptajn Søren Kjelden naapertorlugu, qaqqap sisooqqissinnaanera pissutigalugu aqqartartut sulisinnaanngikkallarput.
- Taamatut suliaqarnissaq oqaluuserineqareerpoq, innarli sisooriataarsinnaammat aqqartartut nunamut qanittumi sulinissaat aarlerinarpallaarpoq, taanna oqarpoq.
Inuit sisamat Nuugaatsiap tassaarsuarmik arfininngormat eqqugaanerata kingornali maqaasineqarput.
Nuugaatsiaq malissuaqarnerani eqqugaanerpaavoq, nunaqarfimmiullu Uummannamut qimarngussorneqarlutik.
Umiarsuup alapernaarsuutip Vædderenip nunaqarfinni allani innuttaasut 80-it missaat aamma qimagussortissimavai. Nunaqarfinni taakkunani malissuaqaqqissinnaanera ilimagineqarluni.
- Ilaat soorunami qiapput aliasullutillu, ajoqusertoqarsimarpasinngilarli, taamatullu nalaataqaraluarlutik ajunngillat, Søren Kjeldsen taama oqarpoq.
Umiarsuaq alapernaarsuut ataasinngornermi suli Uummannamiippoq, qaqqalli sisoorfianut ungasinngitsukkut aallartussaalluni.
- Qaqqap sisooqqissinnaanera aarlerineqarpoq, taamaammat uagut suliassatta ilagaat arlaannik pisoqassagaluarpat tamanna kalerriutigissallugu
- Umiarsuarmik qanillattornissaa uloriananngila?
- Kangerlummi ungasianit itinerusumiillu nakkutigissavarput. Malerujussuit pilissagaluarpata sineriammi ulorianarnerpaaq pissaaq, Søren Kjeldsen taama oqarpoq.