aqqartartoq

Aqqartartuliortup Madsenip inuunerata sinnera paarnaarussaanissaa piumasarineqartoq

Aqqartartuliortartoq Peter Madsen toqutsisutut, toqungasup timaanik ileqqorluttuliornermut allanillu kinguaassiutitigut tunngasunik unnerluutigineqarpoq.

Unnerluussisussaatitaasut aqqartartuliortoq Peter Madsen tusagassiortumut svenskimut Kim Wallimut toqutsisimasutut marlunngornermi unnerluussuteqarput.

47-nik ukiulik Madsen inuunermi sinnera paarnaarussaanissaa piumasarineqarpoq. Tamatuma saniatigut paarinninnissamut piumasaqaat pingaannginnerusoq atorunnaarsinneqarpoq.

Paarineqarnissaanut apeqqut pillugu Peter Madsenip misissorneqarnerata kingorna Retslægerådetimut saqqummiuneqarpoq, nutaamik pinerluuteqartoqaqqinnginnissaa piniarlugu piffissaligaanngitsumik paarnaarussinissaq piumasarineqarsinnaasoq nalilerpaat.

Toqutsineq pilersaarusioreerluni piareersareerluni pisimasoq, unnerluussisussaatitaasut isumaqarput.

Unnerluussut naapertorlugu toqutsineq qanoq pisimanersoq ilisimaneqanngilaq, kisianni savimmik qungasiatigut kapineratigut imaluunnit qiminneratigut pisimasinnaavoq.

Tamatuma saniatigut kinguaassiutitigut atoqateqarnerinnarmiunngitsoq immikkut ittumik ulorianassusilimmik agguinermut unnerluussuteqartoqarpoq.

- Suliaq immikkut illuinnartumik peqqarniippoq, tamanna Kim Wallimut ilaqutaanullu alianartumik kinguneqartitsisimasoq, unnerluussisoq Jakob Buch-Jepsen tusagassiuutinut nalunaarummi oqarpoq.

Unnerluussisussaatitaasut Peter Madsenip aqqartartuliaata isaterneqarnissaa siunertaralugu arsaarinnissutaasoq piumasarineqarpoq.

Powered by Labrador CMS