Aqqaluaq: Suliaq naammassereerpoq

Naalakkersuisut siulittaasuata inatsisinik unioqqutitsilluni landskarsip aningaasaataanik atornerluineranik suliaq naammassereerpoq.

Naalakkersuisut Siulittaasuat Aleqa Hammond aningaasanik unioqqutitsilluni atuisimanera pillugu Inatsisartut Kukkunersiuinermut Ataatsimiititaliaata sulinera naammassereerpoq. Kukkunersiuinermut ataatsimiititaliaq naqissusiivoq Naalakkersuisut Siulittaasuat unioqqutitsilluni aningaasanik atuisimasoq, aamma Naalakkersuisut Siulittaasuata kukkuneq nassuerutigaa. Namminerlu naqissuserpaa piffissami pineqartumi maleruagassat ilisimasimanagit. Taamatut tusagassiorfinnut nalunaarutikkut allappoq IA-mi politikkikkut siulittaasup tullia Inatsisartunullu ilaasortaq Aqqaluaq B. Egede.

Taanna isumaqarpoq pingaaruteqartoq erseqqissassallugu Kukkunersiuinermut Ataatsimiititaliap Aleqa Hammondimik misissuinera naammassereersoq.

Naalakkersuisut Siulittaasuat unioqqutitsisimavoq, suliarlu taamatut inerneqarpoq.

Naalakkersuisut Siulittaasuata unioqqutitsilluni aningaasarpassuarnik atuisimanera annertummat Kukkunersiuinermut Ataatsimiititaliaq aalajangerpoq naalakkersuisoqarfiit allat misissuiffigineqartariaqartut. Tassalu suliassaq alla misissuinerusoq aallartippoq, Aqqaluaq B. Egede nassuiaavoq.

Kisianni Naalakkersuisut Siulittaasuannut tunngasoq naammassereerpoq, naqissuserneqareerpoq Naalakkersuisut Siulittaasuat unioqqutitsisoq, taanna inerniliivoq.

Taamaakkaluartoq Naalakkersuisut Siulittaasuata tusagassiortunik katersortitsinermini inuiaqatigiit isumaqalersinniarsarai misissuineq suli ingerlasoq namminerlu misissuisoqalernera tikilluaqqullugu. Naak nammineq nalunngikkaluarlugu Kukkunersiuinermut Ataatsimiititaliap nalileraa Naalakkersuisut Siulittaasuat unioqqutitsisimasoq. Ataatsimiititaliammi aamma apeqquteqaatigisaanut akissuteqaatimini nassuerutigaa nammineq kukkusimalluni suleriaaserlu ilisimasimanagu, Aqqaluaq B. Egede tikkuaavoq.

Inuit nunatsinni paatsuuinerat ima angitigilerpoq, allaat Inatsisartut Kukkunersiuinermut Ataatsimiititaliaat tatiginanngitsutut oqaatigineqartalerluni, aammalu partiit illuatungiliuttut illersorlugit sulisutut inissinneqarluni. Taamak pisoqarnera inuit naalakkersuinikkut ingerlatsinermut tatiginnikkunnaarnerannik kinguneqarpoq, taanna naliliivoq.

Naalakkersuisut Siulittaasuata tusagassiortunik katersortitsinermini Inatsisartut Kukkunersiuinermut Ataatsimiititaliaata sulinera suliamillu inerniliinera pillugu paatsuunganartumik allatorluinnaq sammivilersuivoq. Tassa avaqqunneqarsinnaanngilaq Inatsisartut Kukkunersiuinermut Ataatsimiititaliaat naapeqqittariaqarmat! Ersarissumik innuttaasut paasitinneqartariaqarput Naalakkersuisut Siulittaasuata unioqqutitsinera pillugu Kukkuneriuinermut Ataatsimiititaliaq qanoq inerniliinersoq, IA-p siulittaasuata tullia isumaqarpoq.

– Innuttaasut eqqortumik paasitinneqarnissaat pisariaqarpoq, tassami naalakkersuinikkut suleriaatsit atuuttut tatiginarluinnartumik ingerlanneqartussaanerat innarlerneqarpoq. Naalakkersuisut Siulittaasuata pisumi suleriaasia akuerineqarsinnaanngilaq inuillu paatsuuinerat tatiginassutsimik innarliisoq Kukkunersiuinermut Ataatsimiititaliap pingaarutilittut suliassatut tigusariaqarpaa.

– Naalakkersuisut Siulittaasuata tusagassiortunik katersortitsinermini akissuteqartarnermini oqaaserisai ilanngullugit nalilersorneqartariaqarput. Nunatta inuisalu eqqortumik siuttoqarnissaat pingaartinneqarnerusariaqarpoq. Matumanimi pineqarmat Naalakkersuisut Siulittaasuat inatsisinik unioqqutitsilluni aningaasanik atuisimasoq. Tassungalu tunngatillugu suliaq erseqqissumik naqissuserneqareerpoq. Inatsisartut Kukkunersiuinermut Ataatsimiititaliaat pingaaruteqarluinnartumik erseqqissaanissaa avaqquneqarsinnaangilaq, Aqqaluaq B. Egede naliliivoq.