IAp siulittaasussaa

Aqqaluaq B. Egede siulittaasutut sassarpoq

Inuit Ataqatigiit siulittaasussarsiornissaanni pisortatigoortumik qinigassanngortittut marluulerput

Qinigaaffik suli naanngitsoq qinigaaffimmit tunuartarnerit Aqqaluaq B. Egedep illuatungilerniarpai

Inuit Ataqatigiinni siulittaasuugallartoq aamma Inatsisartuni ilaasortaq Aqqaluaq B. Egede Inuit Ataqatigiit siulittaasussaattut sassarpoq. Siulittaasussarsiornissamut sassarnerminik pingasunngornermi ualikkut nalunaaruteqarpoq.

Inuit Ataqatigiit nutaamik siulittaasussarsiortussanngorput Kuupik Kleist siulittaasutut martsip aallaqqaataani tunuareersoq. Taannali Inatsisartuni ilaasortaaginnarniarpoq. Sara Olsvig nalunaareerpoq siulittaasussatut qinigassanngortilluni. Folketingimi ilaasortatutut tunuarniarpoq partiimi siulittaasunngussaguni.

- Massakkut Inuit Ataqatigiinni qinikkat ilaasa qinikkatut atuuffissartik aallartisimalaaginnartoq tunuaannartarnerat ersarissumik akerlilerniarpara. Inatsisartuni ilaasortaq Malina Abelsen 1334–nik taaneqarsimasoq Inatsisartuni sulinini unitsikkallarpaa, aamma Sara Olsvig Folketing-mut qinigaatitarput 8135-nik taaneqarsimasoq Inuit Ataqatigiinni siulittaasunngussaguni tunuarnissaminik neriorsuivoq. Tassa qinersisartut 10.000-it misserpiaat matumani pineqarput, Aqqaluaq B. Egede tusagassiutinut nalunaarummi allappoq.

Inuit Ataqatigiit immikkut ittumik ataatsimeersuarneranni peqataasut toqqasavaat kina partiimi siuttunngussanersoq.

- Tusagassiorfinnut nalunaarut aqqutigalugu siulittaasussatut qineqqusaarutissakka tamaasa saqqummiutissanngikkallarpakka. Eqqaarusupparali politikkikkut ingerlateriikkatta saniatigut inuit pissakinnerusut, illoqarfiit isorliunerusut aamma nunaqarfinni inuit atugaasa siuarsarneqarnissaannik isuma ersarinnerulersillugu nukittorsarumagakku. Inuit Ataqatigiit parti saamerliusoq nammaqatigiinnermillu toqqammaveqartoq nukittorsarlugu sulinissaq pisariaqavissutut isigaara. Tamakkua ulluni qaninnerni immikkoortortaqarfinnut ersarinnerusunngorlugit allakkatigut ingerlatissavakka, Aqqaluaq B. Egede oqarpoq.

Powered by Labrador CMS