Skip to main content

Aqqalu Jerimiassen: Inuunera allanngorujussualerpoq

Atassummi siuariangaatsiartoq Aqqalu Jerimiassen Naalakkersuisunut ilaasortat nukarlersarissavaaat. Aqagu marlunngorpat inuussutsissarsiornermut, nukissiornermut niuernermullu naalakkersuisunngussaaq.

31-nik ukiulik Aqqalu Jerimiassen marlunngorpat inuussutissarsiornermut, nukissiornermut aamma niuernermut naalakkersuisunngussaaq, taamaalillunilu Naalakkersuisunut ilaasortani nukarlersanngussaaq. 

- Kim Kielsenip tallimanngormat oqarneratut, sulineq aqagu aallartissaaq. Suliassallu kivinnissaanut piareersimasutut misigisimavunga, Aqqalu Jerimiassen Sermitsiaq.AG-mut taama oqarpoq.

Kisianni illoqarfimmi najugaqarfimminit Ilulissanit nuunnissaq oqitsuinnaanavianngilaq.

Ilulissat maqaasissagaa

- Toqqaannartumik oqaatigissagukku Ilulissat qimannissaa artornarpoq. Nuummut maanna nuunnissamik aalajangerneq oqitsuinnaanngilaq, tassami Inatsisartunut ilaasortannguinnarnissara takorloorsimagaluarpara. Kisianni nuliannit tapersersorneqarluarpunga, Aqqalu Jerimiassen oqaluttuarpoq.

Kisianni Naalakkersuisunut ilaasortaajunnaaruni Ilulissanut angerlaqqinniarpoq.

- Illoqarfik, ilaquttat ulluinnarnilu inuunerput maqaasissavakka. Takornariartitsisartutummi sulisarpunga, tamannalu aamma maqaasissaqaara. Aqaguminngaanniit silami suliffimmit allaffimmi sulilissaanga, Atassummeersoq siullermeerluni 2005-imi Inatsisartunut qinigassanngortissimasoq oqarpoq.

Suliassamut piareersimasoq

Taamanikkut 16-inik taaguunneqarpoq, 2014-imilu Inatsisartunut qinersisoqarmat 20-nit taaguunneqarluni. 

Kisianni tamatuma kingorna Aqqalu Jerimiassen siuariangaatsiarsimavoq. Siorna kommuninut qinersisoqarnerani qinigaalluarpoq, tassanilu 530-nit taaguunneqarpoq, Avannaata Kommuniani kommunalbestyrelsimut ilaasortanngorluni, aammattaaq borgmesterimut sinniisunngorluni. Apriilip 24-anni Inatsisartunut qinersisoqarnerani 322-nit taaguunneqarpoq.

- Taama sukkatigisumik pisoqarnissaa takorloorsimanngikkaluarpara. Annertuumik ineriartorsimavunga, kisianni piareersarnerit nalaanni piffissamik atuinartorujussuunikuuvoq. Inuuneq nutaaq aqagu aallartissaaq, tamannalu pissanganartorujussuussaaq, Aqqalu Jerimiassen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER