aputaajaaneq
Aputaajaasut pisortaat: Kalaallit Nunaanni najugaqarnerput eqqaamallugu!
Ukiortaamiilli illoqarfiit pingaarnersaanni Nuummi apingaatsiartarpoq. Tamannalu innuttaasorpassuit kommunimut saaffiginninnerannik kinguneqarpoq.
Tamatumunnga atatillugu kommunip aputaajaanermut ingerlatsinermut pisortaa, Frank Rasmussen, silatusaaqqusivoq:
- Innuttaasut ilaatigooriarlutik imminnut sumiinnersugut eqqaasittariaqaraluarput. Kalaallit Nunaanni Nuummiippugut, aputeqarnersap qeqqani, piffissanilu sivikinnerusuni aput ajornartorsiortitsisinnaaneranik tamanna isumaqarpoq.
Ukioq nutaami immikkut ittumik apingaatsiarsimasoq oqaatigaa, innuttaasullu saaffiginnissutaat tamaasa kommunip naammassisinnaanngikkaat nassuerutigaa.
- Ukiup siulianut sanilliullugu ukiormanna apinerujussuussasoq ilimanarpoq, kisianni apinera 2014-imi apineratut innissaa suli oqaatigissallugu siusippallaarpoq. Taamaammat maanna ilisimanngisatsinnik aqussinnaanngisatsinnillu maanna inissisimanngilluinnarpugut, taanna Sermitsiaq.AG-mut oqarpoq.
Aputip ajornartorsiortitsinera innuttaasunut, suliffeqarfinnut kommuninullu akisuujusoq taassuma oqaatigaa. Ilaatigut suliffeqarfiit nalinginnaasumik nioqqutissiornerat annikillerujussuartarmat, aammalu sulisut atorneqarsinnaasut tamarmik aputaajaanissamut nuutsinneqartariaqartamata - suliassaq ineriartornermik pilersitsinngitsoq.
- Kommunip aqqusinernik aputaajaanermut aningaasartuutai kisiisa isigissagaanni, apinerujussua annikinnerusumik sunniuteqartarpoq, tassami kommunimi aputaajaanermi suleqatitsinnut amerlanernut aalajangersimasumik isumaqatigiissuteqaratta, Frank Rasmussen ilisimatitsivoq. Taamaammat sanaartugassanik suliassinneqartartut januaarimi immikkut ittumik aningaasartuuteqarujussuarput.
Nuummi pisortat aqquserninut, pisuttarfiinut sumiiffiinilu iluarsaassinissamut kiisalu quasannginnissaanik suliaqarnermut 2017-imi aningaasartuutissat 12 millionit koruuniusut, Frank Rasmussen ilisimatitsivoq.