Ataartartut Kattuffiat
Aput pitsaagaangat kattuffimmi ilaasortaqarnerusartoq
Aputeqarluaraangat Kalaallit Nunaanni Ataartartut Kattuffiani ilaasortat amerlisartut, siulittaasup oqaatigaa.
- Aputeqarneq ataartartut kattuffiani ilaasortaqarniarnikkut sunniuteqartarpoq.
Taama oqarpoq Timooq Mølgaard Kalaallit Nunaannit Ataartartut Kattuffiani siulittaasoq. 2015-immi 2016-llu akornanni kattuffiup ilaasortai 600-ut missaani ikileriaateqarsimapput.
Ukioq mannalu ilaasortat amerleriaateqarsimanissaat, taassuma naatsorsuutigaa. 2015-mimi ilaasortat amerliarsimapput, ukiorlu kingulleq ikileriaateqarsimallutik, tamanna Naatsorsueqqissaartarfiup kisitsisaataani erserpoq.
- Ukioq manna aputingissaarsimavugut, taamaammat ukioq manna ilaasortat qaffariaateqarsinnaalluarput. Tamanna ukiup tulliani naatsorsuineq naammassippata takussavarput. Taamaammat ilaasortat amerleriaateqassappata aputeqassuseq uatsinnut apeqqutaasorujussuusarpoq,Timooq Mølgaard Sermitsiaq.AG-mut oqarpoq.
Atuaruk: Timersortartut ikiliartorput – assammillu arsaattartut amerliartorlutik
Inoqarfinni minnerni unammilligassat
Inoqarfinnilu minnerni siulersuisut suliaqarniarnerat unammillernarsinnaasoq, Timooq Mølgaardip aamma eqqaavaa.
- Ilaasortaqarniarnitsinnut tamanna pissutaaqataasinnaavoq. Kattuffitsinni assigiinngitsunik ataatsimiititaliaqarpugut, tassa ujakkaarnermi, sangusaarnermi snowboardernermilu. Taakku peqatigiiffinnut qanimut suleqatiginnittuusarput. Uanga sangusaarnermut ataatsimiititaliami ilaasortaavunga, siulersuisunilu ingerlatsisoqarnissaa uagut akisussaaffigaarput, taanna oqaluttuarpoq, ukiunilu kingullerni marlunnik peqatigiiffiliortoqarsimasoq paasissutissaralugu. Ataartartut peqatigiiffittaavi tassaapput Nuuk Skiklub aammalu Qaqortumi QSP.
- Aput pitsaavallaanngikkaluartoq kattuffiup ilaasortani ilaasortaaginnarnissaat sulissutigisinnaavaat?
- Aap, tamanna sulissutigilersinnaavarput. Kisianni peqatigiiffiit pisariaqartitaat aallaavigalugit suliaqartarpugut, Timooq Mølgaard oqarpoq.