upernaaq
Apriilimi aatsaat taama kiatsigisoq uuttorneqartoq
Nuuk aamma Kangerlissuaq upernaami ataasinngormat aatsaat taama kiatsigisumik ulloqarpoq
DMI ulluni kingullerni arlalinnik aatsaat taama kiatsigisunik uuttuivoq.
Kangerlussuarmi 17,8°C ataasinngornermi apriilip 11-ani ualikkut kiatsigisoq uuttorneqarpoq.
Nuuk upernaami kiattoq
Siornatigut apriilimi uuttorneqartuni kiannerpaaffigisimavaa 16,0°C, taanna 1996-imi apriilip 30-ani uuttorneqarpoq.
Aamma Nuummi ataasinngornermi kiappoq, tassani mittarfimmi kiassusersiut 16,6°C-imiippoq, apriilimilu tamanna rekortiuvoq, siornatigut taanna 13,0°C-iusimagaluarpoq.
Taanna apriilip 29-ani 1969-imi uuttorneqarsimavoq, DMI oqaluttuarpoq.
Summitimi nillinnginnerusoq
Sermersuup qaarpiaani aamma kiak malugineqarpoq.
Stationimi ilisimatusarfiusumi Summitimi - Sermersuup qeqqani 3.000 meterit missaani portutigisumiittumi - marlunngornermi apriilip 12-ani uuttorneqarpoq, -6,5°C, taanna aamma aatsaat taama kiatsigaaq.
Atuaruk: Nuummi 10 C - Ukiumi unammiuaartitsisussat ajornartoornermi pilersaaruteqarput
Siornatigut tassani -8,2°C rekortiusimagaluarpoq, taanna 2007-imi apriilip 30-ani uuttorneqarsimavoq.
Kalaallit Nunaanni qaammammi apriilimi kiassuseq annertunerpaaq uuttorneqarsimasoq 18,0°C-iuvoq, Narsarsuarmi apriilip 22-ani 1999-mi uuttorneqarsimalluni.
Atuaruk: FN-imi silap pissusianut atsioqatigiinnissami Løkke peqataassanngilaq