Nunatsinni nipilersorneq
Apple Musicimi kalaallit nipilersuutaannik tusarnaartoqarsinnaavoq
Nittartakkakkut kalaallit nipilersuutaannik tusarnaarniarneq assigiinngitsorujussuuvoq
Suliffeqarfissuaq Apple juunip 30-ani Apple Music pilersippaa.
Tassanimi saqqummersitanik pisinngikkaluarluni, qaammammut akiliuteqarnikkut nunarsuarmi nipilersuutit assigiinngitsorpassuit tusarnaarneqarsinnaapput.
Qaammatini siullerni pingasuni ilaasortaaneq akeqanngilaq, tassanngaanniillu qaammammut 99 koruuninik akeqarluni.
Kalaallit nipilersuutaat
Taamaattunili ilaasortaaniaraanni Kalaallit Nunaanni aporfeqarpoq. Internetti akikitsuinnaanngilaq, aamma nittartakkani nipilersuutinik tusarnaartarfiit ilaat kalaallit nipilersuutaannik tusarnaartoqarsinnaaneq ajorluni.
Taamaakkaluartoq allannguuteqariartorpoq.
Illoqarfinni nunaqarfinnilu internetti sukkatsikkiartorpoq, internettimullu akiliutigineqartartut aamma appariartorput.
Nipilersortartut
Kalaallit nipilersortartut Spotifymi Apple Musicimilu saqquminerujartulerputtaaq. Spotify ukiuni arlaqartuni nipilersuutinik tusarnaarfigissallugu periarfissaavoq, Nunatsinneersunilli nipilersortartunik tusarnaagassaqarpiarnani.
Apple Musicikkikkut kalaallit nipilersortartut uku takussaanerupput: Nanook, Small Time Giants, Asuki, Rina, Simon Lynge, Sussat, Kimmernaq aamma Tumaat.
Spotifykkut Sussat aamma Kimmernaq kisimik takussaasuupput.
Apple Musicikkut kalaallit nipilersortartut amerlanerusut saqqummingajalerput, soorlu uku: Jenseeraq, Tulleriit, Kimia, Pavia Geisler, Qarsoq, Qaaq, Thornstone, Pilu, Nina, Rockstones, Ummat, Liima Inui kiisalu Rikka.
Taamaakkaluartorli nuannarineqarluartut soorlu Paarisa Band, Zikaza imaaluunniit G-60 nassaarineqarsinnaanngillat.
Kalaallit Nunaanni nipilersorneq Sermitsiaq.AG-mi septembarimi sammisarineqarpoq.
Oqaluttuarineqartussamik siunnersuutissaqaruit allaffigisigut Facebook-ikkut imaluunniit uunga redaktion@sermitsiaq.ag