Kujataa
Appat toquinnarnikut Danmarkimut nassiuppaat
Laboratorimi misissuinertigut paasiniarneqarpoq kujataani aappat nappasimallutik perlilerlutilluunniit toquinnarsimanersut
Uumasut nakorsat Pinngortitaleriffimmilu ilisimatuut oqaatigisinnaanngikkallarpaat sooq appat kujataani toquinnartarsimanersut. Maanna misissorneqarpoq appat napparsimallutik perlilerlutilluunniit toquinnarsimanersut.
Atuaruk: Nersutit nakorsaat: Appat toquinnarnikut attoqinagit
Appat amerlassutsimikkut isumakuluutigineqareersut oqallisaaqqilerput. Pinngortitaleriffik siunnersuuteqarnikuuvoq appat ukiuni qulini eqqissisitaalluinnassasut imaluunniit ukiumut qaammat ataasiinnaq piniaagaasalissasut. Maanna kujataani piniartut piffissami kingullermi appat toquinnarnikut naammattoortalerpaat piniartunit aallaaneqanngikkaluarlutik toquinnarsimasut.
Atuaruk: Apparpassuit sooq toquinnarsimasut ilisimaneqanngilaq
Nappaat perlilernerluunniit
- Maannakkut oqaatigisinnaanngikkallarparput sooq appat toquinnartarsimanersut, uumasut nakorsaasa qullersaat Asbjørn Brandt Sermitsiaq.AG-mut oqarpoq.
Atuaruk: Appat eqqissisitaalluinnarnissaat biologit inassutigaat
Appat toquinnarnikut katersorneqartut Danmarkimut nassiunneqarsimapput tassanilu Danmarks Tekniske Universitetimi DTU-mi aamma naalagaaffiup inuussutissalerinermi tappiorannartuleriffiani Statens veterinære serumlaboratoriemi misissorneqassallutik
Appat toquinnarnerannut pissutaasinnaasut marluk eqqartorneqarput. Periarfissap aapparaa appat nerisaassaaleqilersimasinnaanerat imaluunnit nappaatip appat akornanni tuniluutilersimasinnaanera. Appat toquinnartut Nanortallip Narsallu akornanni siumorneqartarsimapput.
Silaannaap kissannera
- Pissutsit tamakkiisumik isigalugit suleriuseqarpugut. Paasiniarparput silaannaap kissannerani tamakkiisumik allanngortoqalernersoq imaluunniit nappaammik siaruaattoqalernersoq, Asbjørn Brandt oqarpoq.
Pinngortitaleriffimmeersut aamma kujataani uumasut nakorsaat appat toquinnarsimasut misissuiffigineranni peqataapput. Uumasut nakorsaasa qullersaat appat toquinnarnikut attornaversaaqullugit inassuteqarpoq. Toquinnarsimasuninngooq katersisissagaanni oqartussaasut isumaqatigiissuteqarfigeqqaarlugit tamanna pisassaaq.
- Allatut oqaatigalugu: Inuit pisariaqanngitsumik navianartorsioratarsinnaanerat pinngitsoorusupparput. Naluarpummi sooq appat toquinnarsimanersut, Asbjørn Brandt oqarpoq.