kakkaak
Appat eqqissisitaalluinnarnissaat biologit inassutigaat
Nunatsinni appaqarfiit ilaanni appat 60 procent sinnerlugu ikileriarsimapput nungoratarsinnaallutik
Pinngortitaleriffimmit inassutigineqarpoq Nunatsinni appat ukiuni qulini eqqissisitaalluinnassasut imaluunniit appanniarneq qaammammi ataatsimi taamaallaat pissalissasoq. Arpat sumiiffinni arlalinni nungutaanissamut ulorianartorsiorput arlaanni malunnaatilimmik iliuuseqartoqanngippat, biologit oqarput.
Biologit taama inassuteqarnerannut pissutaavoq Nunatsinni, Islandimi Svalbardimilu appat ikileriarujussuarsimammata. Taama pisoqarneranut pissutaasorineqarpoq pisarineqartartut amerlavallaarnerat aammalu silap allanngorneranit appat toqusartut amerlisimasinnaanerat.
Sumiiffiit ilaat appat piaqqiortarfinni appat 60 procent sinnerlugu ikileriarsimapput allaallu Uummannap eqqaani 74 procentimik ikileriarsimallutik.
- Appat ikiliartorsimapput naak pisarineqartartut ukiut qulit kingulliit ikileriarujussuarsimagaluartut, Flemming Merkel aamma Aili Labansen misissuinermik ingerlatsisut oqarput.
Appat eqqissisitaalluinnassanersut naalakkersuisunit aalajangerneqartussaavoq. Piniarmut aalisarnermullu aqutsisoqarfik kattuffinnut attuumassuteqartunut kommunenullu tusarniaalerpoq eqqissisitsilluinnarsinnaanerup isummerfigineqannginnerani. Biologit isumaqarput Qaanaap eqqaani appat eqqissisitsivinnermi mininneqarsinnaasut taavani appaqassuseq aalaakkaammat aammalu pisarineqartartut amerlanngimmata.