Appat eqqisisimatilluinnarnissaat pilersaarutaanngitsoq

Appat eqqissisimatilluinnarnissaat pisariaqartoq, arlaqartut isumaqarput.

Kalaallit Nunaanni appat piujuaannassappata, WWF Verdensnaturfonden siornatigut utaqqiisaasumik eqqissisimatitsinissamik kajumissaaruteqarnikuugaluarpoq.

Pinngortitaleriffimmi biologit ilisimatitsissutiginikuuaat, appat piujunnaangajalersut, timmisanullu illersuiniaqatigiiffik 'Timmiaq', naalakkersuisup appanniartoqaannarnissaanik siunnersuutaanut pakatsivoq.

Pinngortitaleriffiup ukiuni qulini appanniartoqaqqusaajunnaarnissaa innersuussutiginikuuaa.

Atuaruk: Peqatigiiffik appanik ernumassuteqartoq

Piniaqqusiunnaartoqassanngilaq
Biologit eqqissisimatitsinissamik innersuussutaat Naalakkersuisut malikkusunneraat, Naaja Nathanielsen (IA) paragraf 37 naapertorlugu apeqquteqarpoq.

- Naamik, piniarnermut, aalisarnermut aamma nunalerinermut naalakkersuisup, Karl-Kristian Krusep (S) akissutaani atuarneqarsinnaavoq.

Taanna ilaatigut allappoq, 'appanik eqqissisimatitsilluinnarnissaq nerisaqarnermut ileqqunut pitsaanngitsumik sunniuteqassasoq naatsorsuutigineqarpoq, tassa meeqqat inuusuttullu ileqquusumik nerineqartartunik soqutigisaarutissammata.'

Atuaruk: Ilisimatuut: Taamaattumik appat nungulerput

Piniarneq
Karl-Kristian Kruse allagaqarluni akissuteqarnermini ilisimatitivoq, Kujataani ukiakkut aamma ukiukkut appanik piniarneq qaamatinik marlunnik affaanillu sivikillineqartoq, Avannaanilu piniarneq qaammatinik sisamanik sivikillineqartoq. Ittoqqortoormiillu eqqaani piniarneq aamma qaaammatinik marlunnik sivikillineqarpoq.

Naaja Nathanielsenip siunnersuutiginikuuaa, piniarnermut allagartaqartut kisimik appanik pisaqartassasut. Karl-Kristian Krusep tamanna naaggaarpaa.

- Naalakkersuisooqatigiinnissamik isumaqatigiissut naapertorlugu, inuussutissat avataaniit eqqussuunneqartut ikilisinniarlugit imminut neqissaqarniarnikkullu najugaqarfinni iminut pilersornerulernissaq kissaatigineqarpoq. Innuttaasut imminut pilersornissamut periarfissaat sunngiffimmi piniartartut mininneqannginnerisigut eqqarsaatigaakka, naalakkersuisunut ilaasortaq allappoq.

Atuaruk: Appat eqqissisitaalluinnarnissaat biologit inassutigaat

Biologit kisimik tusaaneqassanngitsut
Siumumi politikerip erseqqissarpaa, atuisut ilisimasaasa tusarniaanermilu akissutit isiginiarnissaat, biologillu siunnersuinerisa kisimik isiginiannginnissaat pingaaruteqartoq.

- Piniarnerup kisimi amerlassutsit timmissallu aalajangersimasumik najorlugit uumaffigisaat ulorianartorsiortinngilai. Silap pissusiisa allanngoriartorneri, angallanneq allallu inunniit iliuuseqarnerit sunniuteqartorujussuupput, aamma nunat sanilerisat iliuusaat, uumasut amerlassusaannut avitseqatigut aamma aalajangiisuusumik sunniuteqarput, Karl-Kristian Kruse erseqqissaavoq.

Naalakkersuisup tusarniaanermut akissutit missingiullu nutaaq Naalakkersuisunit misissorneqareerpat, timmissat illersugaanerat piniagaanerallu pillugit nalunaarut 2016-imi upernaap ingerlanerani tamanut saqqummiunneqassasoq naatsorsuutigaa.

Aamma takukkit:

WWF: Appat eqqissisimatilluinnarnissaat pisariaqarpoq

Eqqissisitsinissaq KNAPKp akerleraa

Naak appat?

Appat ikileriarujussuartut