appat

Appat annertuumik ikileriarujussuartut

Kujataanit paasissutissat nutaat takutippaat, amerlassusaat ilimagineqartumit suli ajornerusoq

Piniarnermut nakkutilliisup Kujataani timmiaqarfik imaarutiivissimarpasittoq takuaa

Siullermik ilimagineqartumit Kujataani appat suli ikinnerupput. Amerlassussaannullu paasissutissat nutaat maanna Pinngortitaleriffik Namminersorlutik Oqartussanut qisuariartitsipput.

Paasissutissat nutaat piniarnermut nakkutilliisuminngaanneerput, taanna Kitsissuni Avallerni qeqertat annersaannut Tupersuartuunut 2015-imi aasaanerani takusaasimavoq. Tassanilu ersarippoq, innaq timmissat inigisartagaat timmiaqanngivittoq.

Timmiaqarluarsimasoq
Tupersuartuut siornagut taassaasimagaluarput qeqertani ataatsimoortuni appaqarfinni taakkunani appaqarfiunerpaaq, appaqarfiullu immikkoortua taanna qimanneqarluinnarsimagunarpoq

Tamannalu ineriartorneq Pinngortitaleriffiup uppernarsaatitut nakkutilliisut assilisaanik naqissuserpaa, tassani assilissap saqqumisortaani 1992-imi, 1999-imi 2010-milu timmissat kisinneqarsimasut 1.900-nik, 1.066-inik 619-inillu amerlassuseqartut kisinneqarsimapput.

Siunnersuineq nutaaq
Pinngortitaleriffiup Namminersorlutik Oqartussanut ammasumik allagaqarnerminni naqissuserpaa, ilisimatuut matumani siunnersuutitik iluarsaattariaqarnerannik paasissutissat nutaat kinguneqassasut.

- Kitsissuni Avallerni qeqertaqatigiiaani allani piaqqiorfiusuni pissutsit Pinngortitaleriffiup sukumiisumik ilisimasaqarfiginngilai, kisiannili 2016-imi kisitseqqinnissaq pilersaarutigalugu. Immikkulli Tupersuartuuni appaqarfiup 2015-imi qimanneqarluinnarsimagunarnera eqqarsaatigalugu takuneqarsinnaalerpoq Pinngortitaleriffiup tamanna sioqqullugu siunnersuisarnerinut naleqqiullugu pissutsit ajorsilluinnalersimasut, ilisimatuut Flemming Merkel aamma Aili Labansen allakkami erseqqissaapput.

Unioqqutitsilluni mannissarneq
Pinngortitaleriffiup tikkuarpaa, appat ikileriarnerannut pissutaasut arlaliusinnaasut, ineqarfimmili tassanerpiaq pissutsit eqqarsaatigalugit uppernarsineqareerpoq inatsisinik unioqqutitsilluni mannissarniartoqartuartarsimasoq.

Powered by Labrador CMS