Piniarneq

Appanniarnermut inerteqqut erseqqissarneqartoq

Aalisarnermut Piniarnermullu Naalakkersuisoqarfik piniarfiusut avataanni piniartoqarnerarlugu nalunaarutit kingorna tikersuussivoq

Taamaallaat Qaanaami aamma Ittoqqortoormiini appanniarsinnaaneq periarfissaavoq

Aalisarnermut Piniarnermullu Naalakkersuisoqarfik piffissap sumiiffiullu avataani unioqqutitsilluni appanik pisaqartoqarsimaneranik nalunaarutinik tigusaqaqqammerpoq. Namminersorlutik Oqartussat taamaammat erseqqissaatigaat appanniarsinnaaneq ulloq 29. februaari naammat.

Taamaallaat Qaanaap aamma Ittoqqortoormiit aqutsiveqarfiini upernaakkut appanniartoqarsinnaavoq.

Atuaruk: Appat eqqisisimatilluinnarnissaat pilersaarutaanngitsoq

Juunip tungaanut
Ittoqqortoormiini upernaakkut appanniarneq 31. maj naassaaq, Qaanaamilu naassalluni ulloq 15. juni. Sumiiffinni allani piniarneq unioqqutsitsinertut isigineqassaaq, politiinullu nalunaarutiginnittoqartassalluni taamatut aalajangersagaq eqquutsinneqanngippat, naalakkersuisoqarfik naqissusiivoq.

Atuaruk: WWF: Kinguaariit tullii appatugassaqanngillat

Unioqqutitsilluni mannissarneq
Namminersorlutik Oqartussat taamatuttaaq aammaarluni erseqqissaatigaat appat imeqqutaallallu manniinik mannissarniartarneq inerteqqutaasoq. Sumiiffinni arlalinni appat ikiliartupiloorsimapput, tassanilu mannissarniartarneq oqaatigineqarluni taamatut ikiliartornermut annerpaamik peqqutit ilaattut.

Atuaruk: Appat manniinik mannissarneq inerteqqutaavoq

Powered by Labrador CMS