Narsaq

Appanik erisarneq ilaanngitsoorpoq

Arfininngormat issip ataani ukiumoortumik juullimi niuffanneq ingerlanneqarpoq. Appanilli erisarnermik unamminissaq nalunaarutigineqarsimasoq ingerlanneqanngitsoorpoq

Pavia Egede ´Santa Pavia´ ukioq manna juullip inuatut inuttaaqqippoq

Narsami aqqusernit quasartorujussuugaluartut ukiumoortumik juullimi niuffannermut inuppassuit takkupput, taannalu ukioqmanna inuusuttut klubbiannit timersortarfimmillu aaqqissuunneqarsimavoq. Ukiuni siuliini taamaattoqartartoq ukioq manna meeqqat meeqqerivimmeersut juullisiutinik atuinngillat, inuusuttut klubbiannit nutaaliaasunik qitittoqanngiloaq, aammalu atisanik takutitsisoqarani.

Appanik erisartoqanngilaq

Nutaatulli appanik erisarnermik unammisitsisoqartussaasimavoq. Taannalu taamaatiinnarneqarpoq, piniartut kangerluup sikoqarnera anorlerpallaarneralu pissutigalugit aallarsinnaanngimmata.

Pavia Egede ´Sanata Pavia´, ukioq manna juullip inuatut inuttaaqqippoq, taavalu Benjamin Kielsen & Co guitarerlutik juullisiutinik atuipput.

Eqquiniutit

Illoqarfimmi sanaluttartut ilarpassui nerriveqarput, tassani sanalukkaminnik nerisassanillu tuniniaallutik.

Meeqqat titartaanermik unammisinneqarput, orpiliarnerullu kingorna Brugseni meeqqanut tamanut iipilinik tunioraavoq.

Naggataatigut eqquiniutinik, inuit pisiarisimasaannik, makitsisoqarpoq, tamatumanilu eqqugassat illoqarfimmi pisiniarfiit tunissutigisimavaat.

Powered by Labrador CMS