aliikkusersuineq

Apollop ilaqutariit unammillerpai

Apollo Jeremiassen nalorsitsaarisuliullugu KNR ilaqutariinnut nalorsistaarinermik saqqummersitsivoq

Nalorsitsaarisartussaq Apollo Jeremiassen

Ilaqutariinnut aliikkutassiaq nunarput pillugu ilinniarfiulluartussaq ‘Nunarput Nalunngiliuk?’ arfininngorpat 10. september ullaap tungaa qulinut KNR Radiokkut aallakaatinneqaqqaassaaq.

Tusagassiortoq ilisarisimaneqarluartoq Apollo Jeremiassen, arfininngornerit tamaasa radiokkut toqqaannartumik tusarnaartartunik nunarput pillugu nalorsitsaarisassaaq.

Aallakaatitassiat nutaat
Radiokkut nalorsitsaarineq ukiaq manna KNR Radiop aallakaatitassiartaavinut arlaqartunut ilaavoq.

- Aliikkutassiamik ilinniarfiutigisinnaasumik ilaqutariinnullu tulluarsinnaasumik aallakaatitassiaqarnissaa kissaatigaarput, KNR Radiomi aaqqissuisoq Alice S. Olsen, tusagassiuutinut nalunaarummi oqarpoq.

Eqqugassat
Arfininngornerit tamaasa Pisiffiup pisiniarfiinut pisissutissaq 1.000 koruunimik nalilik pissarsiarineqarsinnaassaq. Ukiorlu naalerpat finalemut anngukkaanni Air Greenlandimut angalassutissat 15.000 koruunit eqqorneqarsinnaallutik.

Tusarnaartartut apeqqutinik oqaluttuarisaanermut, nunalerinermut, uumasulerinermut, oqaasilerinermut, suliffeqarfinnut, kulturimut tunngasunik allanillu nalorsitsaarneqartassapput.

Apeqqutit nutaarluinnaapput immikkut ilisimasalinnit suliffeqarfinnillu assigiinngitsunit suliarineqarlutik.

Atuaruk: KNR toqqaannarnerusumik aallakaatitsisalerniarpoq

Powered by Labrador CMS